Read Vaiphei JOB 36 Bible Online

JOB 36 - Vaiphei bible

JOB 36

¹Elihu in zia gual hin a gen zui pek a:

²Chomkhat ei khawngai tadi inla, Pathian sik ah gen ding neukhat ka nei nalai ah, hun kawkmu ing ka.

³Ka hetna gamtin hun la khawm ing ka tin, ei Siampa dik zia chu hun taklang ing ka.

⁴Ka thugente hi zuau pang lo ahi’n, hetna bukim neipa chun a hun umpi ngâl a.

⁵Ngai in, Pathian chu hat tak a hi’n, kuama a musit ngai pua’n, thil hethiam thei tak ahi.

⁶Mi nunsia chu a hinghoi ngai pua’n, nuaisia ah um te vang, dik tak in vai a hawm piak sek hi.

⁷Midikte chu ensui zing in, lalchutpha ah lengte le, kumtuang dai dingin a tung dingin, a chawihoi sek hi.

⁸Chun, kol busak a hiu ah, nuaisiana khauhual ah hên, ahi’phat ua leh,

⁹a thilbawl danteu leh a sukkhialnau, kisathei tak ah bawl a la hi dan teu chu, a kiang un a taklang sek a.

¹⁰A bil uh zilsakna lam in a hon piak ah, khawlona lampi kipat, kile’kit dingin thu a piai.

¹¹A ngaisak ua, a na a sep ua chun, a dam sung nikhuau chu, muizang tak in a mang tum sek un, a kumteu chule nuam tak in a mang zo sek ui.

¹²A ngaisak lo ua leh vang, chemjam ah tha’gam ah um in, hetna bei in a thi sek ui.

¹³Pathian neilote lunggil in, lungnatna a kibualden in; hên chak ah a um phat ua leh le, panpi don in a kiko ngai puau hi.

¹⁴A vanglai hun un a thi’u ah, a hinkhuau mualpho tak in a tawp sek hi.

¹⁵La haksatna thokte chu, haksat thokna mangcha’n a hukdok sek ah, la gentheinau mang in la bil uh, a hivan piak sek hi.

¹⁶Buaina lak ah kipat mun thawveng, khumbil umlona mun ah chun, a jawl daw la hi; la an nêkna dawkan ah chun, sathau ah dim lui piak in um ding la hi.

¹⁷Himaleh, nang chu mi nunsiate tawh, kinialna’n la dim ta’n, vaihawmna tawh thudikna chun, a hun mantom tau ahi.

¹⁸Hachang thakna ziakin, mi musitna lungchang pu khan la tiu in, tatna mantamna hin hun pui khial kha’n ah, chingthei tak in um in.

¹⁹La kikona aw leh la hatna chun, a hun hukdok na diam?

²⁰Janthim chu thangai kin, mite chu a umna mun chiat ua, a manthaina hun uh a hisek hi.

²¹Chingthei in! Khawlona lam nga kin; zia tak ah chu gentheina patep la hi kha.

²²Ngai in, Pathian chu, a thilhitheina ziak ah choisa’n ahi’n, ama tawhbang zilsaktu kua’hem um?

²³Kua’ hem a bawl ding dan gen piak ah, ahiloleh, kua’n, “La bawl khial hi,” a ti’thei ua a hem?

²⁴Mihingte’n zaila a choi sek uh, a thilbawl chawihoi ding hi hezing in.

²⁵Mi zosia’n zia chu a en un, gamla tak ah mite’n a thil zing ui.

²⁶Pathian chu a lopi ma ma in, ama chu I he zo puau; a dam sung kumte chule tiamsen gual ahi puai.

²⁷Tuimal vatha te chu a hipto ah, sûm ah pat in gawtui a hung suak ah;

²⁸zia ma ma chu van ah kipat hung ketha suk in, mihingte chung in a zu tha zung zung sek hi.

²⁹Sûmpi a jak mal dan leh, a bûkcha ah van-git dante, kua a hem hechian thei him ding?

³⁰Ngai in, kawlphe’n a kiûm kîmvêlsak ah, tuisuagiat mongte tiang in a khû hi.

³¹Ziate mang hin mite chung in vai a hawm a; kiningting tak in nêk ding an a piai.

³²Têk in a khut a tuam ah, a tupna tak sep kha dingin thu a pia’i.

³³Van-gi chun ama chung thu a gen un; khawlona do ah a hachang thakna chu, a huaisia ma ma hi.