Read Vaiphei JOB 37 Bible Online

JOB 37 - Vaiphei bible

JOB 37

¹Zia thu hinle ka lungthim a kithing ah, a umna mun in a phuzok zok hi.

²Lunglut tak in a la ngai tiam un, a aw gi leh a kam ah kipat, hung gidok chu a la ngai un.

³Van nuai pumpi’n a hun thâdok in, a kawlphe chule lei mong lam tiang in a sawldok hi.

⁴A nung chu a aw git in a zui ah, a lopina aw chu van-gi gual in a gi dul dul ah; a aw git ka het tiang inle, a kawlphete chu a cholsak nai diak puai.

⁵Pathian in a aw chu van-gi gual in, a gitsak dul dul ah, I hetphâk lo ding ua mak, thil tam tak a bawl hi.

⁶Vûk kiang ah chun, “Lei chung ah kia’n,” a ti’n; zia gual ma chun, guamal leh guapi chule a zuk sak hi.

⁷A thilsiam zosia’n a hettheina ding un, mi tin khut ah tepte’na a bawl piak hi.

⁸Ziaphatchun, gamsate’n a huang uh zuan in, a kul sung un a um den tau hi.

⁹A pindan sung ah kipat in, chîmpei a hung pawtdok ah, hui kithejakte lak ah kipat in, khawvotna a hung pawt hi.

¹⁰Pathian hu tha khum ziakin, vûktang a kisiam ah, tuisuagiat lian tak chule, kin tak in a khal zo mai hi.

¹¹Sûmpi sa’tak chu tui a puak sak ah, sûmpite chun a kawlphe a thejak hi.

¹²Mihing chêntheina mun zosia’n, a bawl ding ua thu a piak gual chiat ua, a umtheina ding un, ama pui dan dan in, a kivêl tawl tawl sek ui.

¹³Sukdikna ding a hem, a gam phatna ding a hem leh, a ja’ngaina ziak a hem ah a hun umsak ahi.

¹⁴Aw Job, zia hi ngai tiam in, thip inla, Pathian thilbawl lamdang takte chu, ngaitua tiam in.

¹⁵A chung ua Pathian thupiak dan leh, a sûmpi lak ah kawl a phetsak dante hi, la hia a hem?

¹⁶Sûmpite gik dan a te’thei dan leh, hetna ah a bukim dan leh, a thilbawl lamdang takte leh,

¹⁷simlam hui hân lo ziak ah, lei pumpi a thip dîl dêl ah, la sil leh chênte a hung lum hut hut ziang dante hi, la hia a hem?

¹⁸Ama gual ah nang in, lîmlang hal gual ah tâk, vante chu phejak thei bek ding la hem?

¹⁹A kiang ah bang gen ding la hem, ei hil tiam in; thimna ziakin ka gen ding uh le, ka gen thei ta puau hilam.

²⁰A kiang ah thugen nuam ka hi, ti ama hil masa ding ka hiu em? Ama val zaw ding bep, kua a nuam um ding a hiu em?

²¹Tu’hin, hui a hân ah, a mutthial zaw ah, sûnchang lai tak in nisa, kuama’n a en ngam puau hi.

²²Mallam ah kipat in kawl eng a hung kikhawdok ah, lopina tizat um tak in Pathian a tuamvêl hi.

²³Hat Chungnung Pathian chu I mudok zo puau in, ama chu thilhitheina lopi leh, dikna dim ahi’n, dikna a hau ziakin, kuama pawngbawl pua’n a.

²⁴Ziaziakchun, mite’n a lau ui; mi kipilsakte chu, bang ma’n a ngai puai.