Read Vaiphei JOB 38 Bible Online

JOB 38 - Vaiphei bible

JOB 38

¹Ziaphatchun, chîmpei lakah kipat in LALPA‘n Job a hun dawnhu ta’n:

²hetna pang lo ah thu hilna, bangmalo mai mai gual ah, gen mangthai ziangpa chu kua la hi em?

³Kipawsalsak tak in la kawng hun gâk inla, hun dong ding ka hi’n, lei dawnhu ding ahi.

⁴Leilung kingakna ka phûm lai khan, khoitak ah um la hi em? hetna nei kisa la hi chun ei dawnhu tiam in.

⁵A te’nate hi kua bawl a hem? He ma ma in la! ahiloleh, a chung ah tê’na khauhual chu, kua zan a hem?

⁶A kingakna chu khoitak ah pangcha’, a kil ah suangphûm chu, kua’n a lep a hem?

⁷Jingsol aksi te’n La a sa khawm un, van lam thilte zosia lim ah, kikosak kha kua a hem?

⁸Tuisuagiat te a hung pût daw lai un, kua’n a kotkhak uh a la khâk bit piak a hem?

⁹Tuisuagiat sil leh chên ding ah, sûmpi leh a tuamna puan ding ah, thimna sâ tak ka siam lai ah;

¹⁰a chupna ding chan ka siam ah, a dâlna ding leh a nanna dingte, ka siam lai ah khan,

¹¹a kiang un, “Zia tiang bep hi hung pha unla, a khêl lam vang la hung pêl lo ding uh ahi, zia tiang ah hin la tui kinawk le, a tawp sek ding ahi,” ka ti’piak a.

¹²La pian ah kipat in jingkal chu thu pia’n, phalvak chu a mun ding la hil ngai em?

¹³Lei khû’na hawk in, mi nunsiate chu a kisêlnau ah kipat in, la thing dok kha em?

¹⁴Tungman a châlden na’n a sukdanglam ah, puan a rong ah kihuan, a rong in a sukdanglam gual chu ahi.

¹⁵Sûn hi mi nunsiate chênna dingin a vak ta lua, a khut thâk ding uh a dâl sek hi.

¹⁶Tuisuagiat nâk pûtnate sung ah chun, la lut kha ngai ta’m? A thuk dan te’ dingin la chuan suak kha ta’m?

¹⁷Thi’na kotkhak sung etsak ah um in, thi’na dailîm kotkhak sunglam chu, la mu kha ta em?

¹⁸Leilung letdan hi la he suak tam? Zia haw hi la het suak chun ei hun dawnhu in.

¹⁹Vâk chênna lam chu khoitak a hia, thim umna mun chule khoitak a hem?

²⁰A gam sung ah la puilût thei ah, a In lam zotna lampi le he la hi maw?

²¹Ziate chu he ngut inla, zia lai chun la piang ta’n, la dam sung ni tele a tam ngût ta hilam!

²²Vûk khol khawmna In ah lut in, gial khol khawmna Inte ah chun, la vâklut kha ta a hem?

²³Ziate chu buaina hun leh kidona leh, kisualna ni ah mat ding ah ka koikhol ahi.

²⁴Vak kihawm jakna lampite chu khoi tak a hia, sualam hui chunle khoi tak zui ah, kithe zak a hem?

²⁵Gawpi zukna ding lampi leh, têk kiate lampi ding chu, kua’n a bawl piak a hem?

²⁶Mihing chên lona gamte leh, gamkeu, mihing um lona mun ah gua a zuk ah,

²⁷gamgawchâk leh gam chul hi’nawng ah, hampa a kêdawsak kit theina dingin?

²⁸Gawtui in pa a nei em? Daitui hi kua cha a hem?

²⁹Vûk khalte hi kua sul ah kipat hung piang ah, van ah kipat vûk zu tha hi, kua ah kipat piang a hem?

³⁰Tuisuagiat le suang gual ah hung tak in, tuili thuk tak chungte chule, a tâng mai sek hilam.

³¹Bombial la khit khawm in, zuheisuktun kihenna khauhualte chu, vaphel thei ding la hem?

³²jangkhawlei lomte khi, amau hunbî chiat in la puidok thei in, Bombial leh a note khi, la kaibât thei bek diam?

³³Van lam thilte um ding dan ah, thil kiguatte chu la he em? A um ding dan uh lei chung ah hin, la lemdok thei diam?

³⁴Nang hun chup hial ah tuisâng hung letsak dingin, van ah sûmpite khi la ko’tha thei diam?

³⁵Kawlphete haw chu la kiang ah hung ah, “Zia hin ka um ui,” hung ti dingin la sawldok thei diam?

³⁶Sunggil lam ah pilna hi kua’n a koi ah, ngaitua thiamna hi kua’n a piak sek a hem?

³⁷Kua a hem, sûmpite sim thei ding hial ah pil? Ahiloleh, van ah tui umte chu, kua’n a hun sunthâk sek a hem?

³⁸Bangati tak leh leivuite kilom khawm ah, leivuite a tang ah hung um sek a hiu em?

³⁹Sakeibakneite nêk ding hawl piak in, sakeibaknei note nêk khop ding pia’n,

⁴⁰a kuau ah lupsak hiat hiat in, nêk ding ngak ah kiselte chu, a nêk ding uh pia thei ding la hem?

⁴¹Va-ak chu, a note nêk ding tasam ah, Pathian kiang ah a ham ua, an hawl ah a tat vêl vêl lai un, kua’n an a piak sek a hem?