Read Vaiphei JOB 39 Bible Online

JOB 39 - Vaiphei bible

JOB 39

¹Sakel no nei hun tak la he em? Sazuk, no nei lai tak la mu kha em?

²A gai sung tha jat leh, a no nei ding hun uh la he em?

³Bang chan bok suk ah, bangtik kâl ah a note piang sek a hiu em, ti la he em?

⁴Gamlak ah hung khanglian in, a note chu a hung kikhan tit un; a vakdok un, a hung kile’kit ngai ta puau hi.

⁵Kua a hem, gamsabiltung thâdok sek chu? Sabiltung hat tak kihênnate chu, kua’n a phel piak sek ah a hem?

⁶A tatna ding un pawn lak ka guat piak ah, a chênna ding un sî’te ka pia hilo a hem?

⁷Khawpi husa kipat gamla tak in a kihêmdok un, kuama’n vâk ngam in, na a sepsak ngai puau hi.

⁸Tângjawlte ah nêk hawl in a ta sek un, hampa hing chitin a ne sek ui.

⁹Jangsial in la na a sep piak nuam em? La gan huang in jan khat bêk a giak nuam diam?

¹⁰Khauhual ah langkawn tawh la hêndên thei in, phâicham chu a hun kaibuat piak diam?

¹¹A thahat man in la sep ding zosia, sêm dingin la ngansia thei diam?

¹²La loulai ah bute chu phualjawl ah, hun puak khawm piak dingin, la taksang em?

¹³Vasakol in lim tak in, a tha jap thei maleh, a thaveng mul a um puai.

¹⁴A tui chu leivui in a la hâilum dingin, leitual in a nusia in,

¹⁵mi khatto in chuan kêk kha’n tin, gamsa khat inle chuan kêk kha’n ah, ti khual lo in a nusia ziang sek hi.

¹⁶Ama no hileh kilawm lo khop hial in, a note chu a limsak pua’n; a tui nei ah a gimna chu, bangmalo a suak khak dingle a lauthawng puai.

¹⁷Pathian in pilna nei lo in a siam in, hetthiamna him him a piak lo ziak ahi ngâl a.

¹⁸Taimang ding ah a kisak phat leh vang, sakol leh a chung ah chuangpa chu, bangma’n a ngai puai.

¹⁹Sakol hatna hi nang piak a hem? A ngawng ah a bak hile, nang siam piak a hem?

²⁰Khaubepi gual ah kichawm thei ding ah la siam a hem? A nâkkhawn git nasa chu tizat um tak ahi.

²¹A keng a tat ah, a kisuang ma ma in; gâlvan ah kithuam chu do dingin a kuandok sek hi.

²²Launa chu a nuisan in, a lungthuai ngai pua’n, chemjam lau in a kinung chawn ngai puai.

²³A chung in thalbawm leh chei leh thalte, a kigawtgi lem lum hi.

²⁴Tizat um leh hang tak in, leipêk chung in a ding ah, pengkul git a het leh, a um thim tham thei puai.

²⁵Pengkul git a het phat leh, “Aha!” a ti’n. Gamla tak ah kipat inle, kidona gim leh sepai hotute, kiko aw gi chu a he’phai.

²⁶Nang pilna ziakin a hem, muvânlâi chu a leng in, mallam zuan ah a tha a jak pal sek?

²⁷Nang thupiak ziak a hem Mubuang chu leng to in, sâng tak ah bu a sia?

²⁸Kawl suangpi lak ah khawsa’n, suangpi kawm lak in bit tak in a chêng sek ui.

²⁹Zia kipat chun a nek ding uh a thil veng veng un, gamla tak ah um chule a muthei hi.

³⁰A note’nle thisan a chawp un, saluang umna mun taphot ah chun, a um ziang sek ui.