Read Vaiphei JOB 4 Bible Online

JOB 4 - Vaiphei bible

JOB 4

¹Ziaphatchun, Teman mi Eliphaz in a hun dawnhu a, zia gual hin a gen ta’n:

²Mi pakhat in la maichang kawk in, thu hun gen leh la zada diam? Himaleh, kua a hem, hun dawnhu lo ah um thei ding?

³Ngai tiam in, mi tampi le la hil ta’n, khut zawngkhâl hawle la la hihat hi.

⁴Mi kipalpaite la paukam in la til hangsan sek in, khup zawite chule la la hihat tai.

⁵Himaleh, tu’hin la chung ah a hung tun phatin, la thuak zo ta pua’n; nangma a hung sukkhak phatin, la lung a dong ta mai hi.

⁶La Pathian launa chu la muanpi leh, la diktatna chu la kineppi hilo a hem?

⁷Tu’hin vak lunggel tiam in, gitlona bei kua a mangthai kha ngai em? Ahiloleh, mi diktat khoitak ah, paithâk in a um ngai him him em?

⁸Keima mudân in vang, khawlona lei let ah buaina chi tute chun, zia ma ma chu a ât kit sek ui.

⁹Pathian hu thâkhum mai inle a mangthai sek un, a lungnatna hui in a mût tum mai sek hi.

¹⁰Sakeibaknei kitum leh, sakeibaknei hangsan kitum gite leh, sakeibaknei vanglaite ha zosia chu, hibot in a um zo tai.

¹¹Sakeibaknei hat tak chu, an nêk ding mu zo lo in a thi ta’n, sakeipite chunle a kualnau nusia in, vâk jak zo tau hi.

¹²A gûkcha’n thu kam khat kigen ka he hen, ei hogukna thu chu ka nakhang in a la he tai.

¹³Mihingte i-mut tui tak ah a i-mut kâl un, jan ah ka thil mulawkte ka ngaitua zui lai in,

¹⁴dîpchâk in ka kithing in, zia chun ka gu leh châng zosia a kithin sak ziang hi.

¹⁵Thagau khat in ka mai a hun jut in, ka timul a tho uai ziang hi.

¹⁶A ding zing in ka mu’n la, a mêl chu ka hechian thei puai. A lim chu ka mittha’n a kilang zing ah, himaleh, a thip dil del ziang ta’n; chomkhat zaw in aw git ka hun he’n:

¹⁷Mihing thitheite chu, Pathian âng ah dik bukim a um thei diam? Mihingte him him amau Siampa mit mu ah, thiangtho tawk a um thei diam?

¹⁸A suakte natiangle a muang zo pua’n, a vansawlchâkte diklona nasan a mu sek in;

¹⁹buanthuak In ah chêng mai mai, leivui bep ah kinga leh, nget ah chimtha ziang thei bep hivang bang gual bep in a muanglâ ta diam maw!

²⁰jingkal ah dam chule nitâk masang ah, thi ziang sek ahi ngâl in; kumkhua hetphâk tâk lo dingin, a mangthai zo tau hi.

²¹A puan In khaute haw chu, a lak ua kipat bawdok ah um in, pilna nei lo in a thi tau hi.