Read Vaiphei JOB 41 Bible Online

JOB 41 - Vaiphei bible

JOB 41

¹Leviathan chu ngakuai ah khaidok thei in, a lei chule khau kual ah, khit dên ziang thei ding la hem?

²A nâk ah khauhual ah khit in, ngakuai in a khagu sunthil thei ding la hem?

³Ama chun la kiang ah thil hun don ding a hem? La kiang ah aw nêm tak in a hung pau diam?

⁴Kumkhua’ la suak ah pang dingin, la kiang ah thuthung a siam nuam diam?

⁵Vacha gual bep in la tualthaw thei in, ahiloleh, la suak numeite kihelna dingin, a khau vaw piak thei ding kisa la hem?

⁶Sanga mante kiveina pang thei ding a hem? Sumkawlveite kihop khensak thei ding la hem?

⁷A vun dim hial in ngamatna thikte, la khawchang thei in, a lujang dim set inle nga chei, phudim thei ding kisa la hem?

⁸A chung in la khut vak tha ma tiam in; la kisualpi ding dan chule vak ngaitua tia, zongsak lo hial ding la hi.

⁹Matzaw ding chu lungkham um tak ahi; pathiante nasan in a gâl mu mai mai unle, a datmawu hilo a hem?

¹⁰A vakaitho ngam ding khop ah, mi hangsan a um puau ah, kua a hem a ma-âng ah ding ngam ding?

¹¹Kua a hem, vakilanpi ah suakcha ding? Van nuai ah hin kua a hem um?

¹²A taksa bakte leh, a hatdan leh, a taksa pianphat dante hi, gen lo thei kei puai.

¹³Kua a hem a kituamna chu lip piak thei? Kua a hem a vunthua sung ah lût theng thei?

¹⁴Kua a hem a kam chu keu hong zo ding? A ha tuamte haw chule tizat um tak ahi.

¹⁵A jang vun chu phaw kitiang gual ah, a phulip ah dim ahi’n; a kichalmat gual khop in a det ui.

¹⁶Khat leh khat chu a kichi ma ma in, a kikâl un huizang le a lut thei puai.

¹⁷A kizoptua chiat a hiu, a kitutua a hiu in, kai khen thei lo a hiu.

¹⁸A kichiphit leh meivak a kikhawdok in, a mitchangte chule phalvak bang mai ahi.

¹⁹A kam ah kipat in mei a kuangdok sek in, meisi a lengjak lak lak ziang sek hi.

²⁰A nâk hawm ah kipat meikhu a pawt sek ah, belchiak leh châmpawn kimut kuang a bang hi.

²¹A hu suangmeihol kuang gual chun, a kam ah kipat in meikuang a pawtdok sek hi.

²²A ngawng ah chun a tha hatna a um in, a mai jawn chu tizat umna’n a dim hi.

²³A vun thuate chu a kithua det ma ma in, khoilîng but gual lo ah chak ahi.

²⁴A lungchang chu suang gual ah tâk ahi’n, suang sumhêk gual ah tâk ahi.

²⁵A hung thawdok tak leh pathiante chu a lau un, a kilik phat leh bang a hiu le a kihemil hial ziang sek ui.

²⁶Chemjam ah sat inle a bun pua’n, cheicha, thalchang leh molzum inle a bun puai.

²⁷Thik chu bupawl gual in a ngai ah, sum-eng chule thingmuat gual in.

²⁸Thalchang in a naw mang zo pua’n, vaisuangse changte chule busi gual mai in a ngai hi.

²⁹Khetbûkte chu bupawl tom gual in a ngai ah, molzumte chule a nuisan mai hi.

³⁰A tumpi nuaite chu lei kihâl tâk gual in a hiam ah, chikdawp lak ah phualphêk gual in a kiphâ ziang hi.

³¹Tuipi lithûkte chu bêl so gual in a chiaksak ah, tuisuagiat chule thau thawl gual mai in a bawl hi.

³²A sulnung chu a vak pek ah, mite chun tuipi chu a vam gual in a mu sek ui.

³³Lei chung a hin ama gual ah lau him him nei lo, a kibatpi ganhing dang a um puai.

³⁴Thil nasa taphot chu a en gun chiat ah, thil a kiletsak zosia chung ah lal pen ahi.