Read Vaiphei JOB 42 Bible Online

JOB 42 - Vaiphei bible

JOB 42

¹Ziaphatchun, Job in LALPA zia gual hin a dawnhu ta’n:

²Bangkim la bawlthei hi ti ka hia’i, la thilbawl guat taphot chu, a dâl thei bangma a um puai.

³Hetna pang lo ah thuhilna sêlgu chu kua a hem? Ziaziakchun ei vei, ka het thiamlo ka la genjak ah, kei â ding ah thilmak talua, ka het thiamlote chu.

⁴A la ngaitha’n, hun gen ing ka; hun dong ing ka tin, nang in hun tâklang in.

⁵Nang chu bil ah het mai in ka la hia’n, tu’hin vang ka mit ngei in ka hun mu tai.

⁶Ziaziakchun, kei leh kei ka kiki’dak ta’n, leivui leh vut lak ah kitung in, ka kisîk ta ahi, ti in.

⁷Job kiang ah LALPA‘n zia gual ah a gen zaw phat ah chun, Teman mi Eliphaz kiang ah chun LALPA‘n zia gual hin a gen a: “Ka suak Job in ka chung thu dik tak ah a gen gual ah la gen lo ziak un, nang leh la gualte ni chung ah ka lungnatna a huaisia ma ma hi.

⁸Ziaziakchun, tu’hin, bawngchal pasagi tawh belamchal pasagi, ka suak Job kiang ah hun kai unla, hâlmang thillat vakibawl un; chuleh, ka suak Job in hun pauchap piak intin, zia chu a la pom piak ing ka tin, la mawl dungzui un hun thuk pua’ng ka; ka suak Job gual in ka chung thu dik tak in la gen paw’ngâl ua,” ti in.

⁹Tichun, Teman mi Eliphaz leh Shuhi mi Bildad tawh Naamath mi Zophar chu a chiau ah, LALPA‘n a kiang ua a gen gual chun a vabawl tau ah; chuleh, Job pauchapna chu LALPA‘n a pom tai.

¹⁰Chun, Job in a gualte â ding ah a pauchap zaw phatin, LALPA‘n Job vangphatna a pia kit ah; tichun, Job kiang in LALPA‘n a nei masak le’ni a pia tai.

¹¹Ziaphatchun, a suapite zosia leh a la mêl hiatsate zosia a hung khawm ua, a In ah chun luaithe’na a siam tau ah; LALPA‘n a chung ah thil phalo a tunsak zosia ziakin a thokpi un, a thamuan tau ah; mi tin in paisa neucha chiat leh sana khutsebi a pechiat tau a.

¹²Job hun nunung lam chu a tîl lai sâng a thupi zaw ma ma’n LALPA‘n a maljawl ta’n: belam sîng khat leh sang li, sangawngsau sang guk, bawngchal tuak sang khat, leh sabiltung sang khat a hun nei tai.

¹³Chapa pasagi leh chanu pathumle a nei a.

¹⁴A chanu lianpen min in Jemina a sa’n, a pani’nanu min chu Kezia a hi’n; chuleh, a pathumnanu min in Keren-happukh a sak hi.

¹⁵Zia gam sung zosia chun Job chanute tuk ah mêlpha numei a um puai; chuleh, a pau chun a suapiu pawsalte tawh go a chan khawm ding un a pia’n.

¹⁶Zia nung ah chun Job chu kum za leh sawmli a dam nalai ah; tichun, a chate leh a tute, a khang li’na tiang in a mu man hi.

¹⁷Tichun, Job chu têk tak leh kumting tak in a thi tai.