Read Vaiphei JOB 6 Bible Online

JOB 6 - Vaiphei bible

JOB 6

¹Ziaphatchun, Job in a hun dawnhu a:

²Ka lunggimna gik dan hi te’ thei hihen la, ka vangsiatna hile bûkna’, koikhawm thei hita maleh chu aw!

³Tuisuagiat ah piaunêl um zat sâng inle, gikzaw ding ahi ngâl in; ziaziakchun, ka kamsuak hi, ngaihak sa kiu in.

⁴Hat Chungnung Pathian thalchangte chun, ei kâplet un; ka thagau in a thi’na gûte chu a dawn in, Pathian tizat umnate chu, ei do dingin a kitiang suak tau hi.

⁵Gamsabiltung in hampa a nêk lai in, a kualtha ngai em?

⁶Nikna bei chu chi pang lo in kua’n a ne ngai em? Aktui dida hinle tuina a nei ngai em?

⁷Zia haw gual chu duchâkna him ka nei puai; zia nêkthei thilte hi ka luaksuak hi.

⁸Ka thildot chu mu thei ta ve in, Pathian in ka thildoite ei pia ta ve leh chu aw!

⁹Pathian in ei hi’mangthai nuam hen la, ei paitha dingin, a khut hun lâm nuam ta maleh chu aw!

¹⁰Zia chu ka thamuanna hung hita’n tin; thok zaw lo ding khop natna ka tuak inle, lim tak in um thei ding ka hi, Thiangtho Pa thute chu ka kilepsan paw’ngâl a.

¹¹Ngâk zingna dingin hatna ka nei ah a hem? A leh, ka tawpna ding chu, bang gual a hia zaidaw zing ding ka hi em?

¹²Ka hatna hi suang gual leh, ka taksaphe hile sum-eng gual a hia hem?

¹³Keima leh keima kipanpi theina him ka nei pua’n, ei panpi thei ding zosia chu, la naw mang zaw a hitau in.

¹⁴A gualpha chung ah nunnem nuamlote chu, Hat Chungnung Pathian launa neilo a hiu.

¹⁵Ka gualte chu luicha tui, khawkhâl phat leh kang sek gual;

¹⁶vûktang vâm hial ah, vûktui ah luang dim hial ziang gual a hiu.

¹⁷A lum phat leh a tui tha sek in, a sat phat leh a umna mun uh le, hetphâk a hita puai.

¹⁸Khualzinte chu a lampiu ah kipat pêt mang in, gam awng ah vâklut in, a gam mang chu ahi ngâl ui.

¹⁹Tema mi khualzinte’n a en un, Sheba khualzin mite’n a kineppiu hi.

²⁰Kinem tak in a um un la a lungthuai un, a hung un la a mualpho ui.

²¹Kei â ding ah zia gual bep chu la hiu in; ka vangsiatna tuak la mu tau in, la tiza tau ahi.

²²La kiang un, “Thilpiak ei pia un,” ahiloleh, “La go thilteu lak ah, bang zat a hem ei piau in,” a hem;

²³“Ei do-te lak ah kipat, ei hukdok un,” ahiloleh, “Ei tawdente lak ah kipat, ei tandok un,” a hem, ka ti ngai ah a hem?

²⁴Ei hil tau inla, thipsan na’ng ka; ka thil bawlkhialna ei hilchian tau in.

²⁵Thudik chu a hat namaijen e! Nang uh ei kophilna hin bang a siampha em?

²⁶Mi beidongte thugen chu bangmalo ah ngai ah, thu kigente chu selpho ding kisa la hiu em?

²⁷Nauchagate chung ah âi la sân un, la gualteu lak nasan ah lawkna la hawl ui.

²⁸Tu’hin vang, lungsiat in ei en un, la maichang un zuau gen pua’ng ka.

²⁹Hung kihei unla, a diklo him him bangma bawl hi ki’hen; tu’hin hung kihei un, ka dikna hi man lo sua guat dau in.

³⁰A diklo ka gen ah a hem? siatna chu hekhen thei lo ding ah, ei ngai la hiu em?