Read Vaiphei JOB 7 Bible Online

JOB 7 - Vaiphei bible

JOB 7

¹Lei chung ah mihingte hinkhua hi, a sêm gim ding bep leh, a dam sung hunteu hile, sum law ah sêm gimte gual bep hilo a hiu em?

²Suak nasem in dailîm a ngainat ah, sum law ah nasemte’n a law’u mu kâl a ngaklel gual un,

³tha tam tak a thawn in ka la mang ta’n, jankhua ah gimthoknate kei â ding ah guat in a um tai.

⁴Ka lup phat leh, “Bangtik leh ka tho dia aw,” ka ti’n, kei â di’n phalvak ngâk ah ka kitelna, jankhua a sawt ngei hi.

⁵Ka taksa hi thân leh ki’dak in a tuam in; ka vun hi a hung keu ah; a hung khijak hi.

⁶Ka hinkhua hi kinepna bei ah a tawpna ding lam zuan in, khawl puan-gatte khawthei sâng inle a chan-gang zawi.

⁷Aw Pathian, ka hinna hi hui gual bep ahi ti hia’n la; ka mit in thilpha mu kit ta pua’n a.

⁸Ei etnau mitte chun ei mu kit ta pua’n tin; lei et zing lai un, beimang mai ding ka hi tai.

⁹Sûmpi a kithial daw ah a manthai gual in, Sheol ah lûtte chule, hung pawtdok ta pua’n tiu in;

¹⁰a In un hung kit ta pua’n tiu in, a umna mun chunle he’pha ta pua’n a.

¹¹Ziaziakchun, ka kam hi thipsak pua’ng ka tin, ka lungthim gimna’ hin pau ing ka; ka thasiatna ah chun phun ding ka hi.

¹²“Kei hi tuisuagiat kinawk, ahiloleh Dragon eisa, ei vêng ding koi la hiu em?

¹³Ka jalkhun in ei thamuan intin, ka lupna’n ka phun ah, ei dawn jangkhai dia aw,” ka tileh,

¹⁴nang in ka jan mang in lei thêm lau ah, kilâkna lei musak te’n ei hilau hi;

¹⁵tichun, zia taksa hi put zing sâng in, hêklup ah thi chu ka têl zawi.

¹⁶Ka hinkhua hi ka chimchâk in; kumtuang ah hing zing lo ding ka hi. Ka chang in ei umsak un, ka hinna hile hun chomcha sung, dai bep ahi ngâl in.

¹⁷Mihing hi bang a hia, zia gual tuk ah hi la ngai poimaw ah, la ngaitua sek leh,

¹⁸jingkal si’n ah la kanthâk ah, hun si’n ah la patep sek a hem?

¹⁹Chomkhat bêk ei entha lo in um inla, ka chil ka val sung bêk hi, ka chang in ei umsak lo ding la hem?

²⁰Nang mihingte umchan entha pa, a bawl khial hita mawng lengle, nang chung ah bang ka bawl em? Bang ding ah la kungmui ah ei mang la hem? bangtidan ah nang â ding ah, puakgik hiziang ka hem?

²¹Bang ding ah ka bawlkhialna ngaidam lo ah, ka khawlona le lamang lo la hem? Tu’hin vang lei lak ah ipmu ding ka hita’n, ei hawl in la tiu in la zia hin um ta pua’ng ka.