Read Vaiphei JOB 9 Bible Online

JOB 9 - Vaiphei bible

JOB 9

¹Ziaphatchun, Job in zia gual hin a dawnhu a:

²Zia chu vang thudik ahi ti ka henai; himaleh, Pathian âng ah mihing mai mai hi, thiamchang thei ding a hem?

³Ama kinialpi nuam um ta mawng leh le, sang khat lak ah kam khat ziang ah, dawnhu thei le um pua’n a.

⁴Ama chu lunggil ah pil leh, thilhitheina hat ahi ngâl ah, ama dodâl ah lawting ding kua a hem um?

⁵A lungnat ziak ah tângte chawn mang in, a het lo kâl un a lumlet ah;

⁶lei chu a umna mun in a sawi lîng ah, a kingakna khuampite le a hi’lîng hi;

⁷nisa chu thu a pia’n, a hung suakdok lo mai ah; aksitele a khâk khum in,

⁸ama bep in vante a kaimal ah, tuisuagiat ah dragon chu a chuan den ah;

⁹ama’n Bombial leh zuheisuktun leh, Jangkhawlei leh simlam ah, aksi umnate a siam ah,

¹⁰hetdaw phâk lo ding ah thil thupi leh, simsên gual lo thilmak takte a bawl hi.

¹¹En tiam in, ei hun haw malam in, ahiziak in, ka mu pua’n; a chia pek in, himaleh, ka hechian diak puai.

¹²Ama’n a kilâk in, kua a hem dâl thei? A kiang ah kua’n, “Bang a hem la bawl?” ti’thei ding a hem?

¹³Pathian in a lungnatna chu, a mawk lak kit ziang sek pua’n, Rahab panpitute chu, a mai in a kûn suk tai.

¹⁴Ama dawnhuna dingin, bang paukam mang ding ka hem?

¹⁵A dik hitamawng lengle, ama ka dawnhu thei puai; ei hêkpa kiang in a ja’ngaina don zaw mai ing ka.

¹⁶Ama ko in ama’n ei dawnhu tamawng leh le, ka aw chu ei ngai piak dingin ka gingcha puai.

¹⁷Ama’n thigawpi gual in ei nuai ah, a ziak bei in ka liamnate a hi’pung hi;

¹⁸ka hatle ei laksak man lo in, thasiatna’n ei hi’dim zaw tai.

¹⁹Hatna kidem ding ti leng la, ama a hat ngâl a! Kihêkpi ding gaw ta leng la, kua’n ei kodaw piak ta diam?

²⁰A dik hitamawng lengle, ka kamsuak in thiamlo ei chansak ding ahi’n, demna bei hilengle, diklo ka hi’dan tâklang ding ahi.

²¹Demna bei ka hi, keima le ka kihe zo puai; ka hinkhua hi ka chimchâk hi.

²²A leng un kibang a hiu; ziaziakchun, ama’n demkâi lo leh, mi nunsia chu a susia gêl sek hi, ka ti ahi.

²³Siatna’n phutlopi thi’na a tut chun, mipha haksatna chu a simmaw sek hi.

²⁴Lei pumpi hi mi nunsiate thunuai ah koi ahi’n, a sung ah vaihawmte mit chu a tuam piak hi. Zia gual ah bawl chu ama Pathian ahiloleh, kua bawl hiding a hem?

²⁵Ka dam sung nite hi dâk thak, tai vel sâng in a chan-gang zaw’n, a tai mang un, thilpha him him a mu puau hi.

²⁶Phâiluang pum gual in a kithol chan-gang un, mupi, a samat ding baw gual in a kin-gang ui.

²⁷Ka phunnawinate hemil ta’ng ka tin, ka lungngaina mel liptha’n, mai tai tak in um ta’ng ka, ti malengle,

²⁸ka thokgimna zosia hi ka tiza sek in, midik ah ei koi lo ding la hi ti ka he ngâl a.

²⁹Thiamlo chang tho tho ding ka hi; bang ding ah a thawn ding bep ah sêm gim ding ka hem?

³⁰Sabon ah kisil in, changaltui in ka khutte sawp ziang lengle,

³¹buaksia lak in ei tawden tho tho in la tin, ka sil leh chênte nasan in ei ki’dak ding a hiu.

³²Keima gual ah mihing, ka dawnhu ziang thei leh, ka kinialpi thei ahi paw’ngâl a.

³³Ka kikâl ua endiktu ding, ka chung ua khut tha thei a um paw’ngâl a.

³⁴A mol chu keima ah kipat ladok hen la, a lau umna’n ei hilau dâ leh,

³⁵ziaphat chuleh, ama lau lo in dawnhu ing ka tin, keima lah mi ei ngaitua gual, ka hi puai ti ka he ngâl a.