Read Vaiphei SAM 103 Bible Online

SAM 103 - Vaiphei bible

SAM 103

¹Aw ka hinna, LALPA pâk inla, ka sung ah um zosiate hin, a min thiangtho pâk tau hen.

²Aw ka hinna, LALPA pâk inla, la chung ah a phatna zosia kha hemil kin;

³la manthei lona zosia a ngaidam ah, la natna zosia a hi’dam ah,

⁴la hinna thi’na khûk ah kipat hukdok in, ngilneina leh khawtuana a khuksak in,

⁵la dam sungsia’n thilpha’n a hun hitai in, tichun, la tanglakna chu mupi vânglai gual ah, siamthak in a um sek hi.

⁶LALPA‘n nuaisia ah um zosia â dingin, thiamchanna leh thutanna a bawl piak tai.

⁷A lampite Mosi a hiatsak in, a thilbawlte le Israel mipite a hetsak hi.

⁸LALPA chu khawtua thiamna leh lungsiat thiamna dim, lung niang tak leh ngilneina dim ahi.

⁹Ama’n hun awimaw zing pua’n tin, a lungnatna chu kumkhua’n vopzing pua’n a.

¹⁰I gitlonau dungzui in ei bawl pua’n, I hi’khelnau dungzui inle ei thuk diak puai.

¹¹Vante khi lei chung sâng tak ah a um gual in, ama laute chung ah a ngilneina chu a lian ngal a;

¹²sualam ah kipat tumlam a gamlat gual in, I hi’khelnateu gamla tak in a koimang tai.

¹³Pa’n a chate a lainat gual in, LALPA‘n ama laute a lainat hi.

¹⁴Banggual ah siam I hiu em ti leh, leivui mai ah siam I hiu ti a het ziakin.

¹⁵Mihing vang hampa gual bep a hiu in, gamlak pâkcha gual in a hung lûn un,

¹⁶hui in a hun mût ah, a bei mai sek in; a umna chule hetphâk a hita puai.

¹⁷LALPA ngilnei hepina vang, ama laute chung ah kumtuang ah pat, kumtuang tiang in um intin; a dikna chule a suan a pâkte tiang in um intin;

¹⁸a thuthung zawm tapote leh, a thupiakte zawm zing tapote chung inle.

¹⁹LALPA‘n a lalchutpha van ah a hi’det in, a lenggam chun bangkim chung in vai a hawm hi.

²⁰Aw nang uh a vansawlchâkte haw, nanghaw a thu ngai ah zawm sek, a nasemte haw, LALPA chu pâk tau in.

²¹A sepai honte a dawi gual bawlte haw, LALPA chu pâk tau in.

²²A khutsuakte haw, a lenggam mun tin ah LALPA chu pâk un. Aw ka hinna, LALPA chu pâk ta’n.