Read Vaiphei SAM 104 Bible Online

SAM 104 - Vaiphei bible

SAM 104

¹Aw ka hinna, LALPA chu pâk in. Aw LALPA ka Pathian, la lopi ma ma hi. Za umna leh lopina’n la kithuam in,

²khawvak hi puan gual ah kithuamna’n la mang hi. Puanbûk gual in vante la kaipal in,

³la pindan tungzam te chu tuisuagiat te ah la zam hen; sûmte khi kângtalai in la mang in, huichîm tha chungte’n la chuang ah;

⁴huizang chu sawlchâk in la mang a, mei leh meikuang chu la nasemte a hiu.

⁵Leilung a kilînlona ding in a kingakna chung in la lem hi.

⁶Puan gual in tuisuagiat hi la sil sak in; tui chun tângte chu a khû hi.

⁷La vau leh a jam mang un; la van-gi ziakin a tai mang ui.

⁸Tângte’n a kal to un, a mun ding uh la siampiakna, phâijawlte ah chun a luang suk ui.

⁹Tichun, lei chup mang ding ah a kile’kitlona ding un, a kân lo ding un gamgi la thung hi.

¹⁰Phâijawlte ah chun tuinâk kikhaw dokte la siam ah; tângte kikâl in a luang un,

¹¹gamsa chitinte’n dawn in, gamsabiltungte’n a dang uh a hino sek ui.

¹²Luicha dungte ah chun, chunglêng vachate’n bu a siau in; thingbâk lakte ah chun a hâm sek ui.

¹³La umna sâng takah pat chun mual leh tângte chu, tui in la chap sek in; lei hi la thilbawl gate ah chun a tai sek ui.

¹⁴Hampa chu ganchate â dingin la ke’sak in, lei ah kipat an nêk ding, a hung piandaw theina dingin; thâichi chu mihingte â dingin la ke’sak in;

¹⁵mihing thinlung kipaksak dingin uain la pia’n, a mai taina ding sathau tawh, a thinlung suk-hatna ding vaithum le la piai.

¹⁶LALPA thingphu, Lebanon ah sidar thing a phute chu, tui niang tak in a pia’i.

¹⁷Zia tak ah chun vachate’n bu a siau ah; châk thing lêkte ah chun vakawl in, chênna a siam hi.

¹⁸Tângsângte chu sakêl â ding ahi’n; suangpite chu kawlzu kisêlna ahi.

¹⁹Thapi khi hunbî hetna dingin la siam ah, nisa’nle a tum phat ding a he sek hi.

²⁰Nang in thim la siam ah, zia chu jan a hung hisek in, ziaphat chuleh, gammâng ah zu leh va zosia, a hung tadok sek ui.

²¹Sakeibaknei vanglaite’n, samat ding hawl in a ngîk un; Pathian ah kipat nêk ding a hawl sek ui.

²²Ni a hung suak phat leh a kihêm mang un, a chênna kul chiat un a um sek ui.

²³Ziaphat chuleh, mihingte chu nitâk lam tiang in, amau na chiat sêm dingin a kuandok sek ui.

²⁴Aw LALPA, la thilbawlte a tam na lawm lawm e! Pilna ah la siam sik sek ahi’n; leilung hi la thilsiam in a lua dim tai.

²⁵Zia tak ah sawn tuisuagiat lopi leh, lian tak a um in, Zia chun a bok ah vâk, salian leh neu simsênlote a um ui.

²⁶A sung ah longliante a kitawl un, a sung ah kihel ding ah la siam, Leviathan chule a um hi.

²⁷Zia zosia chun a hun tak ah, a an ding uh la piak ding a thîl zing ui.

²⁸La piak taphot a luak sek un; la khut la phaljak phat leh thilpha’n a dim sek ui.

²⁹La mai la sêlguk phat leh a lungjing sek un; a hat uh la lâkpiak phat leh a thiu a, leivui a suak kit ta sek ui.

³⁰La hu la thâ khum phat leh amau chu siam in a um un; lei chung le la bawl thak kit sek hi.

³¹LALPA lopina chu kumtuang in um hen la; a nasepte ah chun LALPA kipak ta hen.

³²Lei a en suk ah, a kithin sak in; tângte a sukkhak phat leh mei a khudok sek hi.

³³Ka damsung zosia’n LALPA chawihoi in La sâng ka tin; damlai nikhua hin ka Pathian pâk in La sa ding ka hi.

³⁴Ka ngaituana hi a kipakna lam hi hen la, LALPA ah chun ka kipak ngal a.

³⁵Migilote chu lei ah kipat hin hi’mangthai in um uh hen la, mi nunsiate le bei tau hen. Ka hinna, LALPA chu pâk in! LALPA chu pâk un!