Read Vaiphei SAM 105 Bible Online

SAM 105 - Vaiphei bible

SAM 105

¹Aw LALPA kiang ah kipak thu gen unla, a min chu ko tau in; namtin lak ah a thilbawlte hiatsak un.

²Ama chawihoi in La sau inla, ama pâkna La sau in; a thilmak bawl zosia gen vêl un.

³A min thiangtho chu suang unla, LALPA hawlte lungthim chu kipak ta hen.

⁴LALPA leh a hâtna hawl unla, a mêl hawl zing tau in.

⁵A thilbawl lamdang takte chu hawl unla, a thilmak bawlte leh a kamsuak, a vaihawmnate chu hezing un.

⁶Aw, a suak Abraham suante leh, a têlchuam Jakob chate haw.

⁷Ama chu LALPA I Pathian uh ahi’n, khawvel zosia ah vaihawm chu ahi.

⁸A thuthung chu kumkhua’n a hezing hi, suan sang khat chan ah thu a la piak,

⁹Abraham kiangah a thuthung leh, Isak kiangah a thutiam chu a hezing in;

¹⁰zia chu Jakob kiang in a hi’det in, Israelte kiang ah, a kumtuang thuthung ding un a phudet in;

¹¹a kiang un, “Kanaan gam hi la kumkhaw gochan ding un, hun pia’ng ka,” a ti’n.

¹²Mi tawmcha bep ahi lai un, hetkham lo ah tawm leh malzin mai ahi lai un,

¹³nam chuam chuam leh lenggam chuam chuam ah kipat, mi chuam chuam lak ah a um lai un,

¹⁴kuama’n a tawden uh a phal pua’n; amau ziakin lengte natiangle a vau in,

¹⁵a kiang un, “Ka sathaunu’te hi khoikha kiu in; ka jawlneite le khoikha kiu in,” a la ti’n.

¹⁶Zia gam ah chun kial a tunsak ah, nêk ding bangma a umlo phatin,

¹⁷a ma lam un mi pakhat, Joseph chu suak ah zok mang dingin a la sawl a.

¹⁸A kengte chu thikkol in a gêt liam ah, a ngawng ah chun thikkol awsak in a um a;

¹⁹a thugen a hung guitun masangsia’n, LALPA thu’n ama chu patep in a um a.

²⁰Lengpa’n mi sawl in, a va thâdoksak ta’n; mi tin chung ah vaihawmpa chun a thâdok tai.

²¹A Insung ah vaihawm ding leh, a nei zosia chung ah vaihawm ding leh,

²²a miliante chung ah a nop dan dan ah thuhil ding leh, a upate pilna thu hil dingin a siam tai.

²³Ziaphatchun, Israel le Aigupta gam lam in a chia suk ah; Ham gam ah chun Jakob chu malzin in a la chêng tai.

²⁴LALPA‘n a mite nasa tak in a hi’pung a, a mêlmateu sâng ah hatzaw’n a siam a,

²⁵a mêlmateu chu a mite muda ding leh, a suakte chung ah gukkhel tak ah bawl dingin, a lungthim uh a hi’danglam piak tai.

²⁶A suak Mosi leh a mi têlchuam, Aron chu a kiang un a sawl a.

²⁷A lak un a tepte’nate chu a et sak un, Ham gam ah chun thilmakte a bawl ui.

²⁸Ama’n thimpi a sawl ah, a gam uh a hi’thim ta’n; a thute nial in a huhel ui.

²⁹A tuiteu chu thisan a suak sak ah, a sangateu chu a that gam tai.

³⁰A gam uh ukêng a lua dim sak a, lengte pindan sung natiang in.

³¹A thugen mai in thosi hon leh thovai hon, a gam pumpi’n a hung dim tai.

³²Gawpi thasâng in gial a pia’n, a gam pumpi sal êng hial in kawlte a phiai.

³³A grep guiteu leh a theichang kungteu chu, a gawtlum in, a gam ua thingte le a khenbong sik sek tai.

³⁴Thu a gen mai inle khaubepite hung um in, khaubepi simsên lo a hung um un;

³⁵a gam ua thâihing zosia a ne gam un, a lei ga zosiau le a ne zo tai.

³⁶A gam ua cha lutîl zosia, a hatnau ga masa penteu chu a that gam tai.

³⁷Tichun, Israel chu dangka leh, sana tawh a puidok khawm in, a lak un a hisêl lo khat chale a um puau hi.

³⁸Amau a kichâk ziak un, a pawtsan phat un Aiguptate a kipak ui.

³⁹Amau lia dingin sûmpi a ji’n sak a, jan ah salvâk dingin mei a piai.

⁴⁰A don un, tichun, vavêng a pia’n, van ah kipat an niang leh tai in a piai.

⁴¹Suangpi a hong ah, tichun, tui a hung kikhawdok ah; gamkeu ah chun luipi gual in a luang tai.

⁴²A suak Abraham kiangah a thuthung thiangtho kha, a hetzing ziakin.

⁴³Tichun, a mipite chu lim tak in, a têlchuamte chu La sa pum in a puidok hi.

⁴⁴Namtinte gam chu a kiang un a pia hen; tichun, namtinte hausakna zosia a lua sik sek tau;

⁴⁵a thuguatte a zui ua, a dan thute a vop phat theina ding un. LALPA chu pâk tau in!