Read Vaiphei SAM 106 Bible Online

SAM 106 - Vaiphei bible

SAM 106

¹LALPA chu pâk un! Aw LALPA kiang ah kipak thu gen un, ama chu a pha ngal a; a ngilneina’n kumtuang dai ding ahi ngal a.

²Kua ‘hem LALPA thilbawl lopi takte genthei ah, a pâkna zosia puangjak thei ding?

³Vaihawmna dik zuite chu mi hampha a hiu in, bangtik lai ah le dik tak ah bawl zingte ngei chu.

⁴Aw LALPA, la mite la doisakna, la etsak phat leh ei hezing in; amau la hukdaw phat leh ei panpi inla;

⁵la mi doichuamte vangphatna chu ka muu ah, la chite kipakna chu ka limpi ah, la gochante chu ka kisuanpi theina dingin.

⁶Ka pu leh pateu tawh ka la gilo zo tau in; thil phalo ka la bawl tau in, diklo tak in ka la bawl tau hi.

⁷Ka suantuteu in Aigupta gam ah a la um lai ua khan, la thilmak bawlte a la ngaisak puau a; la ngilneina nasa tak kha le a la hezing puau a, Tuipi San ah khan Chungnung Penpa chung in, a la hel zaw tau hi.

⁸A chuti sapi’nle, ama min ziakin, a la hukhing nalai a, a thilhitheina lopi tak chu, a hetsak theina dingin.

⁹Tuipi San chu a vau a, tichun, a kang ta’n; gamkeu ah chia gual in tuipi thûk tak in a pui theng tai.

¹⁰A mêlmateu khut ah kipat in a hukhing a, gâlte khut ah kipat in a hukdok tai.

¹¹Tuite chun a mêlmateu a chup mang ta’n; pakhat chale a suakcha puau hi.

¹²Tichun, a thugente taksang in, a pâkna La a sa tau hi.

¹³Ahi’n la, a thilbawlte a hemil pai un, a lemguatna a ngâk zo ta puau hi.

¹⁴Gamthip ah chun duchâk tun tun a hun nei tau a, gamkeu ah Pathian a patep tau a;

¹⁵a thil dot uh a pia ta’n, himaleh, a lak un natna hî lau um tak a tunsak tai.

¹⁶A giabuk un Mosi a thangsiau a, LALPA mithiangtho Aron ngei le.

¹⁷Lei in a kam a kân, Dathan a valzo ta’n; chuleh, Abiram pawlte le a chup mangsak tai.

¹⁸A lak un mei a hung kuangdok ah, a lak ua migilote chu a kâng tum tai.

¹⁹Horeb tâng ah bawngno lim a siam un, milim kisung chu a ho tau a.

²⁰Pathian lopina chu bawngchal, hampa ne mai mai lim in a theng tau a.

²¹Pathian, amau Hukdampa leh, Aigupta gam ah thil lopi takte, a la bawlpa chu a la hemil tau a.

²²Ham gam ah thilmak a bawlte leh, Tuipi San pang ah thil tizat um takte bawlpa ngei kha.

²³A mi têlchuam Mosi, a thasâng un a la ding lo vang leh, a lungnat ziakin a leng un, a la hi’mangthai mai dingin, a la gen a.

²⁴Gam nuam tak chu a la musit un, a thutiam a la taksang puau hi.

²⁵A puanbûk sung un a phunchiak un, LALPA aw chu a ngai nuam puau hi.

²⁶Tichun, amau lam in a khut a lek ah, amau haw gamthip ah pukse ding leh,

²⁷namtin lak ah a suan a pâkteu thêchek ah, gamtin ah thejak dingin a kitiam ta’n.

²⁸Ziaphatchun, Baal-peor lam in a bek un, hinna neilote kiang ah kithoina thilte a ne tau a;

²⁹a thilbawlteu chun LALPA a chok lungnau ah, tichun, a lak un hipi a hung leng tai.

³⁰Tichun, Phinehas hung dingdok in, a thasâng un a dot piak ta’n; tichun, hipi chu sukbei in a hung um tai.

³¹Zia chu a suan zosia tiang in, ama dikna ah guat in a hung um tai.

³²Meribah tui ah le LALPA a la chok lungnau ah, amau ziakin Mosi chung ah thil phalo tak khat, a hung um khawlaw hial ta’n;

³³a lungthim a su’nau ah, tichun, paukam phalo a hun gendaw khawlaw tai.

³⁴LALPA‘n thu a piak gual in mipite chu a leng un, a that gam ta puau a;

³⁵namdangte tawh kichok-hel in, a thilbawl danteu a zil ta zawu a.

³⁶A milimteu na a sêm un, zia chu amau â dingin thâng a hung hi tai.

³⁷Thithate kiang in a chateu ah kithoina a bawl tau a;

³⁸sia leh pha helote thisan, a chapa leh a chanuteu thisan ngei chu, Kanaante milim kiang in a piau a; zia gam chu thisan in a subuak tau hi.

³⁹Tichun, amau thilbawl ah chun sukbuak in a um zo tau a; amau thilbawl ma ma ah chun a thanghuai gam tau hi.

⁴⁰Tichun, LALPA chu a mite chung in a lungawi ta pua’n; a gochante chu a kidak ta’n;

⁴¹mi tinte khut in a pedok ta’n, amau mudate’n a chung un vai a hawm tau hi.

⁴²A mêlmateu in engbawl in, a thunuai ua tawden in a um tau hi.

⁴³Tam veipi amau a hukdok ah, himaleh, a lemguat dungzui un, a chung in a kiphin tei tei nalai ui, a dukdak lonau ziakin sawt niam in a um tau hi.

⁴⁴Chutisapi’nle a kiko thawm uh a ngai tha; a lungjinnau chu a hetpi hi.

⁴⁵Amau ziakin a thuthung a hezing a, a ngilneina nasat dungzui in, a chung un a ja’ngaina a tâklang tai.

⁴⁶Sal ah puite zosia chu amau a hepisak a.

⁴⁷Aw LALPA, ka Pathian uh, ei hukhing inla, namtin lak ah kipat in ei pui khawm kit in; la min thiangtho chu ka hun pâk ua, nangma pâkna chu ka kisuanpi theina ding un.

⁴⁸LALPA, Israel Pathian chu, kumtuang ah kipat kumtuang tiang in pâk in um ta hen. Mi zosia’n, “Amen,” ti tau hen. LALPA chu pâk tau in!