Read Vaiphei SAM 109 Bible Online

SAM 109 - Vaiphei bible

SAM 109

¹Aw ka chawihoi zing Pathian, thip dil del in um ziang kin.

²Mi nunsia leh thep mangte’n ka chung in, a kam uh a ka tau in, ka siatna dingin zuau thu a phuak ui.

³Huatna thu ngen in ei ûm kîmvêl un, a ziak bei in ei do ui.

⁴Amau ka hepi ziak ah ka pauchap piak sapi’nle, ei hêk un.

⁵Tichun, amau in thilpha chu thil phalo ah ei thuk in, ka hepina huatna’n ei thuk ui.

⁶“Amau kãl dingin migilo guat inla, a changlam in hêktu dinsak zing in.

⁷Patep ah a um phat leh thiamlo chansak in um hen la; a pauchapna chun ama thiamlo chan ta hen.

⁸A dam sung nikhua chom hen la, a hotu hi’na midang chang ta hen.

⁹A chate nauchaga’n um uh hen la, a ji chu meithâi hung hi hen.

¹⁰A chate vâkvâi ah khutdaw in pang uh hen la; a chênnau In sesa kipat in nawdaw in um tau hen.

¹¹A leibatna pa chun a nei zosia chom hen la; mêlhetlote’n a sepgimna ga lâkpiak uh hen.

¹²A chung ah ja’ngai ding kuama um kiu hen la, a nauchaga nutsiate hepitu ding khat chale um kiu hen.

¹³A suante chu paithâk in um uh hen la; a min uh le a khang ni na’n thaimang in um ta hen.

¹⁴A pateu gitlona kha LALPA âng ah het zing hi hen la, a nu gitlonale thaimang in um ki’hen.

¹⁵Ziate chu LALPA ma’n um zing hen la, ama hetzingna chu lei ah kipat in pai mang hita hen.

¹⁶Ja’ngaina châng a het lo ziak leh chaga leh, tasamte leh panpitu neilote, thagam gua a delzui ziakin.

¹⁷Hânsialaw a thatnop gual in, hânsia law khum in um ta hen! Mi a maljawl nop lo gual in, kuama’nle maljawl kiu hen!

¹⁸puanâk chual gual in hânsialawna kithuamna’n a mang in; a hânsialawna chun tui gual in a taksa jun hen la, sathau gual in a gu sung in lût ta hen.

¹⁹Hânsia lawna chun a kithuamna puan gual in, tuam zing hen la, nisi’n in a kawnggâk gual in gâk zing ta hen!” a tiu hi.

²⁰Zia gual chu ei do-te leh ka hinna do ah ei gensete, LALPA‘n a thukna hita hen.

²¹Himaleh, aw LALPA ka Lal pen, la min ziakin nang in keima sik in hun bawl inla; la ngilneina a phat ziakin ei hukdok ta’n.

²²Keima genthei leh tasam, ka thinlung hi ka sung ah hiliam ahi tâk ziakin.

²³Nitâk lam nilîm gual in ka mang hia’i hia’i ah; khaubepi gual ah thinthâk in ka um hi.

²⁴Ka anngawlna ziakin ka khûpte hi a zawi zo ta’n, ka taksa le a gawng chin chen ziang tai.

²⁵Ei demte nuizatbûk ka hung hita’n, ei mû si’n uh leh a luu ei thin khum sek ui.

²⁶Aw LALPA ka Pathian, ei panpi in! La ngilneina dungzui in ei hukhing ta’n!

²⁷Zia chu la khut ahi ti a het ua, nangma LALPA chun la bawl ahi ti, a hiattheina ding un.

²⁸Amau in hânsia law maleu, nang in vang ei maljawl ta’n. Ei do-te chu mualpho tau hen la, la suak hi vang kipak ta hen.

²⁹Ei do-te chu mualphona puan in kithuam tau hen la; maikhûna puan gual in mualphona chun tuam ta hen.

³⁰Ka kam in LALPA kiang ah kipak thu, nasa tak in gen ing ka tin; mipi nasa takte lak ah chun pakcha ta’ng ka.

³¹Tasamte panpi vak ding leh a thi’na ding ua, thiamlo chansakte khut ah kipat a hukdaw ziakin.