Read Vaiphei SAM 116 Bible Online

SAM 116 - Vaiphei bible

SAM 116

¹Ka aw leh ka dotnate ei ngaithâk ziakin, LALPA chu ka ngai na’i.

²Ka lam ah a bil a hun daw ziakin, ka damsung sia’n ko zing ing ka.

³Thi’na khauhualte chun ei zem ah, Sheol gûte chun ei zo ta’n; lungkhamna leh beidonna ka tuak hi.

⁴Ziaphatchun, LALPA min ka lam ah: “Aw LALPA, ka hinna hukhing in,” tin ka don a.

⁵LALPA chu mi hepi thei tak leh dik tak ahi; I Pathian uh hi mi lainat thei tak ahi.

⁶LALPA‘n mimawlte a humbit sek a; tawden ah ka um phat leh ei hukdok sek hi.

⁷Aw ka hinna, la cholna lam ah chun chia kit ta’n, LALPA‘n la chung ah pha tak in a bawl ta ngal a.

⁸Ka hinna thi’na lak ah kipat, ka mitte mitthi lak ah kipat leh, ka kengte kipûkna lak ah la hukhing ta’ngal a.

⁹Tichun, mihingte gam ah hin, LALPA âng ah chia bep ka hi.

¹⁰“Nasa tak ah sukgenthei ah um ka hi,” ka ti lai inle ka ginna chu ka vop zing in;

¹¹ka lauthawng lai in, “Mitin vang zuauthei a hiu,” ka la ti hen.

¹²Ka chung ah a thilbawl phat zosia ziakin, LALPA kiang ah bang a hem ka piak thuk ding?

¹³Hukdamna no la’ng ka tin, LALPA min lam ing ka.

¹⁴A mite zosia âng ah chun, LALPA kiang ah ka thutiamte mualsua ing ka.

¹⁵A mithiangthote thi’na chu, LALPA mit mu in lûl tak ahi.

¹⁶Aw LALPA, la suak ka hi; nangma suak, la suaknu chapa ngei chu ka hi. Ka kolbu lei thap piak tai.

¹⁷Kipakna thillat pia’ng ka tin, LALPA min ko ta’ng ka.

¹⁸A mite zosia âng ah chun, LALPA kiang ah ka thutiamte mualsua ing ka;

¹⁹LALPA In huang sung tual lai ah, aw Jerusalem, la sung ah chun mualsua ing ka. LALPA chu pâk tau in!