Read Vaiphei SAM 118 Bible Online

SAM 118 - Vaiphei bible

SAM 118

¹Aw LALPA kiang in kipak thu gen un, ama chu a pha ngal a; a ngilneina’n kumtuang a dai hi.

²“A ngilneina’n kumtuang a dai hi,” Israelte’n ti tau hen.

³“A ngilneina’n kumtuang a dai hi,” Aron chanaute’n ti tau hen.

⁴“A ngilneina’n kumtuang a dai hi,” LALPA lau mite chun ti tau hen.

⁵Ka lungdonna kipat in LALPA ka ko in; LALPA‘n ei dawnhu ah, mun awngthawl tak in ei umsak tai.

⁶LALPA kei lam ah pang ahi, lau pua’ng ka. Mihing in bang ei law thei ding a hiu em?

⁷LALPA chu ei panpi ding ah kei lam ah pang ahi; ei mudate chung ah ka gualzawna chu, mu ngei ding ka hi.

⁸Mihingte kisuanpi sâng in, LALPA bêl chu a pha zawi.

⁹Miliante kisuanpi sâng in, LALPA bêl chu a pha zawi.

¹⁰Namtin in ei ûm kîmvêl un, LALPA min in amau chu hi’mangthai ing ka!

¹¹Amau chun ei ûm kîmvêl un, kiltin in ei ûm kîmvêl ui; LALPA min in amau chu hi’mangthai ing ka!

¹²Khuaipite gual in ei ûm kîmvêl un, lingbuk meikâng gual in a kuang un; LALPA min in amau chu hi’mangthai ing ka!

¹³Hat tak ah sot in ka um ta’n, ka kipûk ta’n, himaleh, LALPA‘n ei panpi tai.

¹⁴LALPA chu ka hatna leh ka tha ahi’n; ka hukhingpa a hung hi tai.

¹⁵Midikte puanbûk ah chun gualzaw’na La het ahi’n; “LALPA changlam khut in hangsan tak in a bawl sek in;

¹⁶LALPA changlam khut chu choisa’n in a um sek in, LALPA khut changlam in hangsan tak in a bawl sek hi”.

¹⁷Thi lo in, dam ing ka tin; LALPA thilbawlte chu hetsak zaw’ng ka.

¹⁸LALPA‘n na tak in ei thunun ta’n, maleh, thi’na kiang in vang ei pedok ziang puai.

¹⁹Dikna kotkhakte chu ei hon piak inla, zia chu ka lût ah, LALPA min ka pâk theina dingin.

²⁰Zia tak hi LALPA kotkhak chu ahi, midikte chu zia chun lût theng in au.

²¹Ka pauchapna lei lawtin ziak leh, ka hukdampa la hung hi tâk ziakin, kipak thu ka hun gen hi.

²²In samite suang doi lo kha, zia ngei chu a kil ah suang poimaw pen a hung hi tai.

²³Zia chu LALPA thilbawl ahi, I mit muu in a mak hi.

²⁴Zia hi LALPA ni guat chu ahi’n, zia ni hin kipak in lim hitiu.

²⁵Aw LALPA, lungsiat ah ei hukdok dingin, ka hun don la hi! Aw LALPA, lungsiat in ei lawtin sak in aw!

²⁶LALPA min ah hung chu mi hampha ahi! LALPA In ah kipat in ka hun maljawl ui.

²⁷LALPA chu Pathian ahi’n, vâk ei hun pia tai. Thingbâkte chawi kawm in kût mang pan unla, mâichâm ningzumte chu hual vel tau in.

²⁸Nang ka Pathian la hi, la kiang in kipak thu hun gen ing ka; nang ka Pathian la hi, hun chawisâng ing ka.

²⁹Aw LALPA a phatna ziakin kipak thu gen unla, a ngilneina’n kumtuang a dai ngal a.