Read Vaiphei SAM 119 Bible Online

SAM 119 - Vaiphei bible

SAM 119

¹Dem kâi lo ah um ah, LALPA dan dungzui ah umte chu a nau a vâk hi.

²A thu hetsak vopdet ah, a lungthim zosiau ah hawlte chu, mi vangpha a hiu;

³diklona him him bawl lo ah, a lampite haw sek mite ngei chu.

⁴Nang in la thununna thute chu, phatchuamngai tak ah ka vop theina dingin, thu lei pia ta ngal a.

⁵La thuguatte chu zawm dingin ka umdante hi, det ta maijen leh ka ti ngei!

⁶La thupiak zosia ka ngaikhawk phat leh, mualpho lo hial ding ka hi.

⁷La vaihawmna dikte ka zui phat leh, thinlung dik tak pu’n kipak thu gen ta’ng ka.

⁸Ei nusia lojen inla, la thuguatte chu zui ta’ng ka;

⁹Khangdawng in la thu dungzui ah, a um dan a venphat lo ngal leh, bangti’n a um dan hithiangtho thei ding a hem?

¹⁰Ka thinlung zosia’n ka hun hawl ah, aw, la thupiakte ka nutsia ding phal lojen in.

¹¹La chung ah thil ka hi’khial lona dingin, la thu ka lunggil in ka khol khawm hi.

¹²Aw LALPA, nang chu maljawl in um inla, la thuguatte chu ei zilsak in.

¹³La kam ah la vaihawmna thu pawt zosia chu ka mûk in ka hetsak tai.

¹⁴Hausakna zosia neite kipakna sâng in, la thu hetsakna dungzui ah um in, ka lim zaw ma ma hi.

¹⁵La thununna thute ngaitua ing ka tin, la lampite ngaisak ing ka.

¹⁶La thuguatte chung ah kipak ing ka tin, la thu chu hemil pua’ng ka.

¹⁷Hing leh dam ah la thu ka zoptheina dingin, la suak chung ah hin pha tak in bawl in.

¹⁸La dan thu ah kipat thil lamdang ka mutheina dingin, ka mitte ei sukvak piak in.

¹⁹Lei ah hin malzin ka hi, la thupiakte ka kiang ah îm kin.

²⁰La dan thuguatte chu ka ngai in, ka hinna hi valzaw in a um zing hi.

²¹La thupiakte jamsan sek, mi kisathei hânsiadongte la hilgai a;

²²amau gensiatna leh musitna hi, ka kiang ah kipat lamang in; la thu hetsakte ka zui ngal a.

²³Milian leh lalte ka siatna ding ngaitua in, kichukhawm maleu; la suak hin la thu guatte ngaitua zing in a.

²⁴La thu hetsakte ka kipakna ahi’n, thupha ei kawkmute a hiu.

²⁵Ka hinna leivui lak in a bek den tai, la thu dungzui in ei hi’hal kit in.

²⁶Ka umdante ka hun hetsak phatin, lei dawnhu ta’n; la dan thute chu ei zilsak ta’n.

²⁷La thununna lampite chu ei hiat thiamsak inla, tichun, la thilbawl lamdang takte chu, ngaitua ta’ng ka.

²⁸Ka hinna lungngai ziakin a chautha zo ta’n; la thu dungzui in ei hi’hat kit in.

²⁹Umdan diklo keima ah kipat lamang inla; lungsiat tak in la dan ei hil in.

³⁰Gin umna lampi ka la têl ta’n; la vaihawmnate chu ka ma’n ka koi zing hi.

³¹Aw LALPA, la thu hetsakte ka tudet hi; ei mualphosak kin.

³²La thupiak lampi del ing ka tin, ka hiatthiamna lei suklet piak ta’ngal a.

³³Aw LALPA, la thuguat lampi chu ei zilsak inla, tichun, a tawp tiang in haw ing ka.

³⁴La dan ka vop phat theina dingin hiatthiamna ei pia’n; tichun, ka thinlung zosia’n zawm ing ka.

³⁵La thupiak dungzui in ei pui in, zia chu ka kipakna lam tak ahi ngal a.

³⁶La thu hetsak lam ah ka thinlung kaihei inla, keima â ding bep ah lawkna hilo dingin.

³⁷Bangmalo mai mai en lo dingin ka mit kaihei inla, la lung lam in hinna ei pia’n.

³⁸La thutiam chu la suak kiang ah phudet in, zia chu nangma laute chan ahi ngal a.

³⁹Ka tizat ma ma gensiatna chu lamang in, la vaihawmnate la a pha ngal a.

⁴⁰Entia, la thununna thute ka ngainat dan hi; la dikna ziakin hinna ei pia’n.

⁴¹Aw LALPA, la ngilneina ka kiang hung tung hen la, la hukdamna chule la thu dungzui in hung tung ta hen.

⁴²Tichun, ei simmawte dawnhuna ding nei ta’ng ka, la thu ka taksang ngal a.

⁴³Ka lei ah kipat thu tak lamang suak ziang kin; la vaihawmnate chu ka kinepna ahi ngal a.

⁴⁴Kumtuang kumtuang ah chawl lo in, la dan chu vop zing ta’ng ka.

⁴⁵Zalen tak in chia thei ta’ng ka tin, la thununna thute ka hawl ngal a.

⁴⁶La thutanna thute chu, lalte ma’nle gen ing ka tin, zakcha ngai ngai pua’ng ka.

⁴⁷La thupiakte zui chu thâtnop um ka sa’n, ka ngaina ma ma ngal a.

⁴⁸La thupiak ka ngainat ma ma te chu, ka ja ma ma hen; tichun, la thu guatte chu ngaitua ing ka.

⁴⁹La suak kiang ah la thutiam kha hezing inla, zia chun lei kinepsak ta’ngal a.

⁵⁰La thutiam chun hinna ei pia’n, zia chu ka haksat hun inle ka thamuanna ahi.

⁵¹Kiletsakte chun nasa tak in ei simmawu hen, himaleh, la dan chu ka pêtsan ngai puai.

⁵²Aw LALPA, malai ah la vaihawm dante kha, ka ngaitua si’n leh, ka thamuanna a hisek hi.

⁵³La dan thu limsak lo, migilote ziakin lungnatna huaisia tak ka nei hi.

⁵⁴Ka khualzinna gam ah hin la thuguatte chu, ka La ahi zing sek hi.

⁵⁵Aw LALPA, jan si’n leh la min ka hezing in, la dan le ka zawm zing hi.

⁵⁶La dan thuguatte ka zop ziakin, zia gual ah vangphatnate chu ka chang ta ahi.

⁵⁷LALPA chu ka chanvo ahi; la thute zui dingin ka kitiam tai.

⁵⁸Ka thinlung zosia’n la hepina ka don hi, la thutiam dungzui in ei lainat ta’n.

⁵⁹La lampite ka ngaitua phat leh, la thu hetsak lam in kãl ka suan hi.

⁶⁰La thupiakte zawm dingin ka kinaw in, ka khawngai puai.

⁶¹Migilote khauhual chun ei zem tom maleh, la dan chu ka hemil diak puai.

⁶²La vaihawmnate a dik ziakin, jankhang lai inle kipak thu gen in tho sek ing ka.

⁶³Nangma kicha mite leh, la thununna thu zawm taphot â ding ah gualpha ka hi.

⁶⁴Aw LALPA, leilung hi la ngilneina’n a dim in, la thuguatte chu ei hil ta’n.

⁶⁵Aw LALPA, la thu dungzui in la suak hi la bawl pha tai.

⁶⁶Vaihawmna pha leh hiatthiamna ei hil in, la thupiakte chu ka gingcha ngal a.

⁶⁷Hi’genthei ah ka um ma khan ka la vâkmang sek ah, tu’hin vang la thu ka zawm tai.

⁶⁸Nang vang la pha hen, thilpha ngen la bawl hi; la thuguatte chu ei hil ta’n.

⁶⁹Mi kiletsakte chun ka chung ah zuau thu a phuak kawm un, ke’n vang ka thinlung zosia hin, la thununna thute chu ka vop zing hi.

⁷⁰Amau chun hiatthiamna him him a nei puau a; kei vang la dan ah hin ka kipak hi.

⁷¹La thu guatte chu ka ziltheina dingin, hi’genthei ah ka um hi kei â dingin a phai.

⁷²Sana leh dangka sâng tam tak sâng in, la kam ah dan pawtte hi kei â dingin a phazawi.

⁷³La khut in lei siam in, lei guanggal ta’n; la thupiakte ka ziltheina dingin, hiatthiamna ei pia’n.

⁷⁴La thu ka thangai zing sek ziak hin, nangma laute’n ei mu’n tiu in, kipak in au.

⁷⁵Aw LALPA, la thutannate a dik hi ti leh, la ginumna’n lei hi’genthei sek ahi, ti ka hechian tai.

⁷⁶La suak kiang ah la thutiam dungzui in, la ngilneinate chu ka thamuanna hita hen.

⁷⁷Ka hintheina dingin, la lainatnate chu ka kiang hung tung ta hen; la dan chu ka kipakna ahi ngal a.

⁷⁸Mi kisatheite chu sukmualpho hiu hen la, amau in diklo tak in ei tawden ta’ngal un; ke’n vang la thununna thute chu ngaitua ing ka.

⁷⁹Nangma laute chun ka lam hun ngau hen la, chutileh, la thu hetsakte chu hethei ta’n au.

⁸⁰Ka mualpho lona dingin, ka thinlung in la thu guatte chu, dem kâi lo in zui zing ta hen.

⁸¹La hukhinna ngai in ka hinna hi a chautha tai; la thu chu ka kinepna ahi.

⁸²La thutiam thîlna’n ka mit a vai zo ta’n; “Nang in bangtik leh lei thamuan diam?” ka ti sek hi.

⁸³Savun thawl panna bei, mei ah kihak keu tawhbang bep ka hita’n; himaleh, la thu guatte chu ka hemil ngai diak puai.

⁸⁴La suak hin bang chan ngâk nalai ding ka hem? Ei h’igentheite chung ah hin bangtik leh, vaihawm ding la hi tam?

⁸⁵Mi kisatheite’n ka kiakna dingin kawkhûk a cho un; la dan a ngaisak puau hi.

⁸⁶La thupiak zosia chu a taksan um hi; a ziak bei in ei hi’genthei un, ei panpi in!

⁸⁷Amau chun lei ah hin ei hi’mangthai vang vang sek un; ke’n vang la thununna thute chu ka kiheisan ngai puai.

⁸⁸La kam ah la thu hetsakte chu, ka zoptheina dingin, la ngilneina ziakin ka hinna vêng bit in.

⁸⁹LALPA chu kumkhua’n a um a, la thute chu van ah phudet ahi.

⁹⁰La ginumna chun suan zosia tiang a dai in; leilung hi la phudet ziakin, det tak in a um hi.

⁹¹La guat dungzui in tu’ni tiang hin a um zing un, thil zosia hi la suakte ngen ahi ngal un.

⁹²La dan chu ka kipakna hida vang leh, ka haksatna hin a la mangthai ta ding ka hi.

⁹³La thununna thute chu bangtik lai inle, hemil ta pua’ng ka; nang in ziate ah chun hin leh dam lei pia ta ngal a.

⁹⁴Nang â ka hi, ei hukdam in; la thununna thute ka hawl zing ngal a.

⁹⁵Migilote chun ei hi’mangthai gua’n, ei chânggu zing un; ke’n vang la thu hetsakte ka ngaitua zing hi.

⁹⁶Bangkim in chintawk a nei chiat un, la thupiak hin vang a huap lian ma ma hi.

⁹⁷Aw, la dan ka ngaina na lawm lawm e! Sun nitum ah ka ngaitua pen chu ahi.

⁹⁸La thupiakte chun ka mêlmate sâng ah, pilzaw’n ei siam a; ka kiang ah ei umpi zing ahiziak in.

⁹⁹La thu hetsakte ka ngaitua zing ziakin, ei zilsakte zosia sâng in pilna ka hau zawi.

¹⁰⁰La thununna thute ka vop phat ziakin, têksete sâng inle ka hethiam zawi.

¹⁰¹La thu ka zop zing theina dingin, lam diklo ah chun ka kengte hi ka suan nuam puai.

¹⁰²Nang in lei hil ziakin, la vaihawmnate lak ah kipat in ka pêt mang puai.

¹⁰³La thute hi a thum na lawm lawm e! Ka kam â dingin khuaizu sâng in a thum zawi!

¹⁰⁴La thununna thute ziakin hiatthiamna ka nei sek hi; ziaziakchun, umchan diklo zosia hi ka hua ahi.

¹⁰⁵La thu hi ka kengte â dingin thaumei ahi’n; ka lampi â dingin vâk ahi.

¹⁰⁶La vaihawmna dik zosia zui dingin, thuthung ka siam in, ka hi’det ngal tai.

¹⁰⁷Nasa tak ah sukgenthei in ka um tai; aw LALPA, la thu dungzui in hinna ei pia’n.

¹⁰⁸Aw LALPA, ka kipakna thilpiak hi ei sân piak inla, la vaihawmnate chu ei hil in.

¹⁰⁹Ka khut in ka hinna a hum zing ah, himaleh, la dan ka hemil ngai puai.

¹¹⁰Migiloten ka awkna dingin thâng a kam un, ahi’n la, la thununna thute chu, ka vâk mangsan ngai puai.

¹¹¹La thu hetsakte chu ka kumkhaw go ahi’n; ziate chu ka thinlung kipakna ahi.

¹¹²Kumkhua’n, a tawp tiang ah, la thuguatte gual ah bawl dingin, ka thinlung ah thupukna ka nei tai.

¹¹³Lungthim mumal neilote chu ka hua hen, la dan vang ka ngaina ahi.

¹¹⁴Nang chu ka kisêlna leh ka phaw la hi’n; la thu chu ka kinepna ahi.

¹¹⁵Ka Pathian thupiakte chu ka vop phat theina dingin, nanghaw thil phalo bawl zosiate haw, ei nusia sik sek tau in.

¹¹⁶Ka hintheina dingin, la thu gual in ei tuzing inla; ka kinepna hin ei mualpho sak kin.

¹¹⁷Ka bit ah, la thuguatte, ka khawksak thei zingna dingin, ei tuzing in.

¹¹⁸Nang in la thuguat vâk mang san zosia la mu tawm ah; a dawhau phalo tak chu bangmalo mai ahi ngal a.

¹¹⁹Lei chung ah migilo zosia chu ki’dak gual in la koi a; tichun, la thu hetsakte chu ka thangai ahi.

¹²⁰Ka taksa hi nangma lau in a kithing in, la vaihawmnate chu ka lau hi.

¹²¹A dik leh a pha bep ka bawl in, ei tawdente khut in ei nusia kin.

¹²²La suak phat theina dingin nangma hung kipia’n; Pathian he’phalote tawden in ei umsak kin.

¹²³La hukhinna thîlna’n ka mit a chau ta’n, la thutiam dikna pitinna ngei chu.

¹²⁴La ngilneina dungzui in la suak chung ah bawl inla, la thuguatte chu ei hil in.

¹²⁵La suak ka hi, la thu hetsakte, ka hiat thiam theina dingin, hiatthiamna ei pia’n.

¹²⁶LALPA, la dan chu bawsiat ah a um tâk ziakin, tu’hi nangma sep hun ahi tai.

¹²⁷La thu piakte hi sana sâng ah, sana thiangtho sâng inle ka ngaina zawi.

¹²⁸La dan thute dungzui in kãl ka suan hi; umdan diklo zosia hi ka hua ahi.

¹²⁹La thu guatte chu a mak hi; ziaziakchun, ka hinna hin a vop pha zing hi.

¹³⁰La thu hilchet hin mite vakna a pia’n; mimawlte hiatthiamna a piai.

¹³¹La thupiakte ka thangai ziakin, ka kam kâ’n, ka ha dûp dûp ahi.

¹³²La min thangaite la hepi sek gual ah khan, ka lam hun nga’n la, ei lungsiat in.

¹³³La thutiam dungzui in ka kalsuante hi siam det inla, phatlona ka chung ah thu nei sak him him kin.

¹³⁴La thununna thu ka zoptheina dingin, mihingte nuaisiana lak ah kipat in ei hukhing in.

¹³⁵La suak chung ah hin la mai hi’vâk inla, la thu guatte chu ei hil in.

¹³⁶La dan bawsiat ahi ziakin, ka mitthi tui luipi gual in a luang tai.

¹³⁷Aw LALPA, nang vang la dik in, la vaihawmte le a dik suak hi.

¹³⁸La vaihawmnate chu dikna leh ginumna ngen ahi.

¹³⁹Ei do-te’n la thu a hetmil ziak un, ka phatchuam ngaina’n ei val zo ding ahi tai.

¹⁴⁰La thutep chu pha tak ah patep zaw a hita’n, zia chu la suak in a ngaina ma ma hi.

¹⁴¹Mineu leh mu tawm ah um ka hi, ahi’n, la thununna thute chu ka hemil ngai puai.

¹⁴²La dikna chu kumkhua dikna ahi hen, la dan le thutak ahi.

¹⁴³Lungkhamna leh thavaina chun ei chup mang ta maleh, la thupiakte chu ka kipakna ahi.

¹⁴⁴La thupuandawte chu kumtuang in a dik hi; ka hintheina dingin hiatthiamna ei pia ta’n.

¹⁴⁵Aw LALPA, ka thinlung zosia’n ka hun ko ah, ei ngaitha’n, la thuguatte vop pha ding ka hi.

¹⁴⁶La thu hiatsakte ka zoptheina dingin ka hun ko hi, ei hukhing ta’n.

¹⁴⁷Phalvak ma ah thodok in, la panpi’na ngai in ka hun ko la hi; la thute ah chun ka kinem hi.

¹⁴⁸La thutiam ka ngaitua theina dingin, janven hunbîte masang in, ka mit ka hak zo ta’i.

¹⁴⁹La ngilneina dungzui in ka aw hi ngaitha’n la, aw LALPA, la vaihawm dik ziakin ka hinna vêng bit in.

¹⁵⁰Ngaituana phalo nei pum ah, ei gawtte chun ei hun nai tau hi; amau chu la dan ah kipat gamla tak ah um a hiu.

¹⁵¹Aw LALPA, nang vang la nai zing ah, la thupiak zosia le thu tak ngen ahi.

¹⁵²Malai ah kipat khan ziate chu, kumtuang dai ding ah la sukdetsa ahi tai, ti ka hiatsa ahi.

¹⁵³Ka genthei dan hi ngaitua inla, ei hukhing ta’n; la dan chu ka hemil ngai paw’ngal a.

¹⁵⁴Ka chung thu ei genpi inla, ei tandok in; la thutiam dungzui in ka hinna humbit in.

¹⁵⁵La thuguatte a hawl lo ziak un, hukdamna chu mi nunsiate â dingin a gamla ma ma hi.

¹⁵⁶Aw LALPA, la lainatna a nasa na e! La vaihawmna dik dungzui in hinna ei pia’n.

¹⁵⁷Ei êngbawlte leh ei do-te chu tam tak a hiu in, ahi’n la, la thu hiatsakte chu ka pêtsan ngai puai.

¹⁵⁸La thupiakte a zop lo ziak un, lepchia tak ah bawl mite chu, lungkham tak in ka en hi.

¹⁵⁹La thununna thute ka ngainat dan hi ngaitua inla; la ngilneina dungzui in ka hinna vop bit in.

¹⁶⁰La thu chu thu tak ngen ahi; la vaihawmna dik tak chunle kumkhua dai in a.

¹⁶¹Milian leh lal te’n a ziak bei in ei engbawl un, ka thinlung chun vang la thute hi a lau ma ma hi.

¹⁶²Gâllâk lopi tak chomkhawmte gual in, la thu ah hin ka lim ma ma hi.

¹⁶³Zuau ka huan, ka ki’dak hi; la dan vang ka ngai na’i.

¹⁶⁴La vaihawmte a dik ziakin, ni khat sung mai ah le sagivei ka hun pâk sek la hi.

¹⁶⁵La dan ngaina mite chun, thamuanna nasa tak a nei ui; bangma’n a kipal pûksak thei puai.

¹⁶⁶Aw LALPA, la hukdamna ka kineppi zing ah, la thupiak ka zui buting hi.

¹⁶⁷Ka hinna hin la thu hetsakte a zawm sek in; ka ngaina ma ma hi.

¹⁶⁸La thununna thute leh, la thu hetsakte chu ka vop sek in, ka umdan zosia la ma-âng in a kilang sik sek hi.

¹⁶⁹Aw LALPA, ka hun ko’na thawm hi, la ma’n hung tung hen la; la thu dungzui in hiatthiamna ei pia’n.

¹⁷⁰Lungsiat in ka dotna la ma’n tung hen la; la thutiam dungzui in ei hukhing ta’n.

¹⁷¹Nang in la thuguatte chu lei hil tâk ziakin, ka mûk in pâkna La tui gual in luangdok ta hen.

¹⁷²La thupiak zosia a dik ziakin, ka lei hin la thutiam pâkna La sa ta hen.

¹⁷³La khut chu ei panpi ding ah kisa zosa’n um hen, la thununna thute chu ka têl ta ngal a.

¹⁷⁴Aw LALPA, la hukdamna chu ka thangai hi, la dân chu ka kipakna ahi.

¹⁷⁵Nangma ka hun pâk theina dingin ei hinsak inla, la vaihawmnate’n le ei panpi ta’n.

¹⁷⁶Belam mang gual in ka vâkmang ta’n, la suak hi hawldok ta’n; la thupiakte ka hemil ngai paw’ngal a.