Read Vaiphei SAM 139 Bible Online

SAM 139 - Vaiphei bible

SAM 139

¹Aw LALPA, nang in lei en suak kei ah, lei hechian tai.

²Nang in ka chut leh ka din la hia’n; gamla tak ah kipat in ka ngaituanate la hia’i.

³Ka chiana lampi leh ka i-mut lei enchian ah, ka umdan zosia la he suak hi.

⁴Aw LALPA, ka lei ah kipat, thumal khat le a pawt masang in, nang in a leng in la he suak tai.

⁵Nang in ka nung lam leh ka ma lam in lei ûm suak ah; ka chung in la khut la nga nalai sêt hi.

⁶Zia gual lawm ah hetna chu, kei â dingin a mak talua hen; a sâng talua’n, ka bat phâk lo ahi.

⁷La thagau ah kipat khoi ah chia ding ka hem? La ma ah kipat khoi ah jam mang ding ka hem?

⁸Van ah kal to leng la, zia chun la um ngal a; Sheol ah lupna bawl leng la, zia chunle la um ngal a.

⁹Jingtha jak in tuisuagiat tawp pen ah vaum lengle,

¹⁰zia chunle la khut in ei la tuzing in la tin, la khut changlam in ei la tudet zing ding la hi’ngal a.

¹¹“Matheilo in thim in ei khu zo intin, ka kîmvêl ah vâk hi janthim hung suak hen,” ti leng la,

¹²nang â dingin janthim hile a thim diak pua’n; jan chu sun gual in a vâk in, nang dingin thim leh vâk chu a kibang ahi ngal a.

¹³Ka sunggil lam siamtuakpa chu nangma la hi’n; ka nu sûl sung ah khan lei la zop khawm suak ahi tai.

¹⁴Tizat um tak leh lamdang tak ah siam ka hiziak in, ka hun pakcha la hi. La thilbawlte hi a mak hi ti, ka hinna’n a hechian tai.

¹⁵A gûk ah siam ka hi’lai ah, lei mun thûk pen ah hoi tak ah siam ka hilai khan, ka gu leh chângte hi nangma ah kipat, selgûk in a um puai.

¹⁶Siam bukim ah ka um ma’nle, lei la mu suak ta ahi. Ka damsung ni ding ah la tiamsa zosia chu, ni khatle mat ahi ma’n, la lekhabu ah chun la zik lut zo tai.

¹⁷Aw Pathian, la ngaituanate chu, kei di’n a het hak na e! bang jat bep a hita’m?

¹⁸Sim ding ka tileh piaunêl sâng in a tam zaw’n; ka hung khatlaw phatin, la kiang in ka la um zing nalai hi.

¹⁹Aw Pathian, migilote chu thatgam mai lechin aw, thisan sua thanuamte chun, ei nusia sik sek ta’n tiu in;

²⁰nangma huatna ziak ah hun gensia sekte leh, nangma dem ah la min gen thanghuaite chun, la siatna ding a ngaituau hi!

²¹Aw LALPA, nangma hun mudate chu, ke’nle muda lo ding ka hem? Nangma hun do-te chu ke’nle, luaksuak um sa lo diak ding ka hem?

²²Amau chu huat takzet in ka hua hen; ka mêlmate lak in ka sim khawm tai.

²³Aw Pathian, ngun tak in ei enchian inla, ka thinlung hi hechian ta’n; ei patep inla, ka ngaituanate hi hia’n.

²⁴Keima ah hin mi nunsiate lampi, a um leh umlo enchian inla, kumtuang lampi ah chun ei pui zing ta’n.