Read Vaiphei SAM 22 Bible Online

SAM 22 - Vaiphei bible

SAM 22

¹Ka Pathian, ka Pathian, bang ding ah ei nusia la hem? Bang ding ah ei panpi ding leh, ka thûmna thute he ding ah ei gamlat la hem?

²Aw ka Pathian, sûn in ka hun ko ah, maleh, lei dawnhu pua’n; jan inle ka hun ko ah, ahi’n, chawldamna ka mu puai.

³Ahi’n, nang vang la thiangtho ah, Israelte pakchatna mun ah chawisa’n la hi.

⁴Ka pu leh pateu in nang a la muang un; a la muan gual un la la hukdok tai.

⁵A hun ko un, tichun, hukdam in a um sek ui; nangma a hun muang un, tichun, a mualpho ngai puau hi.

⁶Kei vang lungno tawhbang mai ka hi’n, mihingle ka hi puai; midangte tawtnopna leh engsiatna mai ka hi.

⁷Ei mu tapo in ei dâi chavai un; a mûk uh a pubawk in, a luchang uh ei pei khum un:

⁸“LALPA chung ah kinga ta’n la; ama’n hukdok hen la, a kipakna lam bawlte chu, hukdok leh hiding a pom!” a tiu a.

⁹Nang chu vang sûl ah kipat ei ladokpa la hi’n; ka nu ângsung ah ka um lai khan, nang in lei la humbit tai.

¹⁰Ka pian ah kipat in, la chung ah ngak ka la hita’n, ka nu’n ei hi’n ah kipat khan, nang chu ka Pathian la hi tai.

¹¹Gamla’n ei nusia kin, buaina a nai ngal a, ei panpi ding kuama a um puai.

¹²Bawngchal tam tak in ei ûm kîmvêl un, Bashan gam ah bawngchal hât takte chun, ei ûm kîmvêl dep dup ui;

¹³sakeibaknei gilkial leh kitum gual in, a kam uh ei kât khum ui.

¹⁴Tui gual ah butthâk in ka um in, ka gu zosia le a kilawng zo tai; ka thinlung le khuailu gual in, ka awp sung hin a tui zo tai.

¹⁵Ka kam hi bêlhal gual in a keugawp ta’n, ka lei le ka khadang in a bek den ta’n; thi’na leivui lak in lei lupsak ta ahi.

¹⁶Uichate’n ei ûm kîmvêl un; thil phalo bawlte’n ei ûm chak ui. Ka khut leh kengte a kilden un;

¹⁷ka gu zosia le ka tiam thei tai. Amau in ei mitchangsâl nalai sêt un;

¹⁸ka puansilte a kihawm un, ka puan’ak chang dingin âi a sân ui.

¹⁹Aw LALPA, nang in vang ei gamlat kin! Aw, ei panpipa, ei panpi dingin hung kin-gang in!

²⁰Ka hinna chemjam ah kipat in hukdok inla, ka hinkhua uicha thilhitheina lak ah kipat in humbit ta’n!

²¹Sakeibaknei kam ah kipat in ei hukdok in! Jangsial kî ah kipat in ei hukdok ta’n!

²²Ka suapite kiang in la min hil ing ka tin; mipi kikhawmte lak ah la min pâk ing ka.

²³LALPA ki’chate haw, ama chu pâk un! Jakob suan zosiate haw, ama chu chawihoi un! Israel suan zosiate haw, ama ja tak in ho tau in!

²⁴Ama’n genthei thuakte chu a mu tawm puan, a ki’dak diak puai; a mai ei sêlgûksan diak pua’n, ama ka ko tak leh ei ngaitha sek ngal a.

²⁵Kikhopna thupi tak ah ka hun pâk sekna hi, nangma kiang ah kipat ahi hen; ama ki’chate lak ah ka thutiam mualsua ing ka.

²⁶Migentheite chun ne’n tiu in vâ in au; ama hawlte chun LALPA pakcha’n au. La lungthim uh kumtuang in hing zing ta hen!

²⁷Kawlkil tiang ah mite’n hezing in, LALPA lam hun nga ta’n au; namtin ah kipat chitinte a ma’n kûn ta’n au.

²⁸Chungnunna chu LALPA â ahi’n, nam tin chung ah vaihawmpa ahi ngal a.

²⁹A kiang ah chun lei ah ipmu tasa zosia khiangkho in au; leivui a la suak ta sa zosia a âng ah khiangkho intiu in, kei vang ama â dingin hing ing ka.

³⁰Khangthakte’n a na sêm intiu in; khangthak hung um dingte chu, LALPA chanchin a la hilsawn intiu in,

³¹mipi a piang nailote hukdawna ding, ama’n a la bawl zo tai, ti thu puangjak ta’n au.