Read Vaiphei SAM 25 Bible Online

SAM 25 - Vaiphei bible

SAM 25

¹Aw LALPA, nangma lam ka lungthim in ka hun bân to hi.

²Aw ka Pathian, nang ka ging ah, ei mualphosak kin; ei do-te ka chung in kithang phatsak kin.

³Nangma ngâk zosia kuama mualphosak kin; lepchia tak ah tawite chu vang mualphosak zaw’n.

⁴Aw LALPA, la lampite chu ei hetsak inla, la lampite chu ei hil ta’n.

⁵La thutak ah chun ei pui inla, ei hil ta’n; ka hukhinna Pathian chu nang la hi’ngal a; nitum in ka hun ngâk zing hi.

⁶Aw LALPA, la lainatna leh la ngilnei dante kha hezing inla, tu’ma lam ah kipat a la umsa a hita ngal a.

⁷Ka khangdawng lai gitlonate leh, ka hi’khelnate chu hezing kin la; aw LALPA, la phatna leh, la ngilneina ziakin ei hezing ta’n!

⁸LALPA chu a pha’n, a dik ah; tichun, migilote chu lam dik a kawk mu hi.

⁹Thunuaigolte chu lam dik in a pui hen, thunuaigolte chu a lampi a hil sek hi.

¹⁰A thuthung leh a thuguat zawmte â dingin, LALPA lampi zosia chu ngilneina leh thutak ngen ahi.

¹¹Aw LALPA, la min ziakin ka gitlona ngaidam in, ka gitlona a huaisia ngal a.

¹²LALPA lau mi chu kua a hem? Zia mite lampi zui ding chu hil in a.

¹³Neinung tak in um zing intiu in, a suante’n gam hi lua in au.

¹⁴LALPA chu ama laute gualpha ahi’n, a thuthung chu a kiang un a hetsak sek hi.

¹⁵Ka mit in LALPA a en zing ah, lenthâng ah kipat in ka kengte hi, puaidok ding ahi ngal a.

¹⁶Ka lam hun nga’n la, ka chung ah ja’ngai in; thawmhau leh gawt ah um ka hi.

¹⁷Ka lungthim buainate hi ei dawn jang piak inla, ka lungjinna kipat hin ei puidok ta’n.

¹⁸Ka thok genthei dan leh ka buaina hi, ei ngaitua piak inla; ka gitlona zosia ngaidam in.

¹⁹Ei do-te tam dan hi ngaitua in, bang gual bep ah ei hua a hitau em?

²⁰Aw, ka hinna vêng inla, hukhing ta’n; ei mualphosak kin, nangma hun bêl ka hi’ngal a.

²¹Ginumna leh dikna’n ei humbit ta’n, ka hun ngâk zing hi.

²²Aw Pathian, Israelte chu a buainau, zosia lak ah kipat in hukdok ta’n.