Read Vaiphei SAM 26 Bible Online

SAM 26 - Vaiphei bible

SAM 26

¹Aw LALPA, ka dikna latsak ta’n; lungthim dik tak pu ka hi’ngal a; ginglâ lo hial in LALPA chu ka taksang hi.

²Aw LALPA, ei enchian in la ei patep in; ka lungthim leh ka ngaituana enchian in.

³La ngilneina chu ka ma’n a um zing a, la thu tak in ka um zing hi.

⁴Mi mantheilote tawh ka kichu khawm ngai pua’n, mi phalêmte tawh le ka kithukop ngai pua’n;

⁵thil phalo bawlte tawh kipawl khawm chu ka hua hen, mi nunsiate kiang in kichu pua’ng ka.

⁶Mawna bei in ka khut sawp ing ka tin; tichun aw LALPA, la mâichâm kîmvêl ing ka tin,

⁷kipakna La ngai tak ah sa pum in, la thilbawl mak zosia chu puangjak ing ka.

⁸Aw LALPA, la chênna In, la lopina umna chu ka ngaina na e!

⁹Mi gilote tawh ei gawt khawm kin la, ka hinna le thisan sua mang mite tawh, sumangthai khawm kin.

¹⁰A khut ua ngaituana phalo nei ah, a changlam khut golgûkna dimte lak in ei pansak kin.

¹¹Kei vang lungthim dik tak pu’n um ing ka tin; ei hukdok inla, ei lungsiat ta’n.

¹²Lau umna zosia lak ah ka bit ta’n; kikhopna thupi tak ah chun LALPA pâk ing ka.