Read Vaiphei SAM 31 Bible Online

SAM 31 - Vaiphei bible

SAM 31

¹Aw LALPA, la humbitna hawlin ka hun bêl hi; ei mualphosak him him kin; la dikna’n ei hukhing in.

²Keima lam ah la nakhang hun daw inla, ei hukhing kin in. Ka kisêlna suangpi leh, ei hukhingpa ding ah kulpi det hung hita’n.

³Nang ka suangpi leh ka kulpi la hi takzet hi; la min ziakin ei pui inla, ei kaibât in;

⁴a gûk ah ka awkna ding, lênthâng ah kipat ei kaidok in, nang ka kulpi la hi’ngal a.

⁵La khut in ka thagau ka hun vopsak hi; Aw LALPA, Pathian ginum, nang in lei hukdok tai.

⁶Milim mantheilo buaipite chu la hua hen; ke’n vang LALPA ka muang hi.

⁷La ngilneina ziakin hun chawihoi in lim ing ka, ka lungjinna la mu tak ziakin, ka mêlmate ah kipat lei ngaisak ta ahi.

⁸Chuleh, ei do-te khut in ei pedok kin la; ka keng hi mun awngthawl tak ah la lângkâi zaw tai.

⁹Aw LALPA, ei lungsiat inla, lungjing tak ah um ka hi’ngal in; lungkhamna ziakin ka mit, a chau huai huai ah; ahi, ka hinna leh ka taksa, natiang hile a chau ta ahi.

¹⁰Ka damsung hi lungngaina’n mang zo ding ka hita’n, ka kumte hi thûmna’n ka mang zo tai; ka vangsiatna ziakin ka tha a kia hen, ka gute le a ngâm zo tai.

¹¹Ka mêlmate zosia musit leh, ka Invêngte tizat in ka um ta’n; ka mêlhette â dinginle lau um tak ka hi tai; khawlai ah ei mu tapo inle ei taisan tau hi.

¹²Mithi hetmil ahi gual in hetmil in ka um ta’n; bêl sia gual bep ka hi tai.

¹³Mi tam tak kiho gûkna ka hegu ta’n, lau umna’n ei tuam kîmvêl hi! Keima kãl in thil a guanggal khawm un, ka thi’na ding a ngaituau hi.

¹⁴Himaleh, aw LALPA, nang ka hun ging ah; “Ka Pathian la hi,” ka ti hen.

¹⁵Ka hunte chu la khut in a um in, ei do-te khut leh ei sugentheite lak ah kipat hin ei hukhing ta’n.

¹⁶La suak chung ah hin la mêl vâk ta hen la, la ngilneina’n ei hukhing ta’n.

¹⁷Aw LALPA, ei mualphosak kin la, ka hun ko ngal ah; mi nunsiate hi mualphosak inla, pau maw hial in Sheol lam zot sak ta’n.

¹⁸Muk zuauthei kisathei tak leh, engsia tak ah mi diktatte gensete chu, thip bek in um tau hen.

¹⁹Aw nangma kichate â ding ah la phatna khol khawm, mi zosia mit mu ah nangma ah, ginna ngate â ding ah la bawl piak ding chu, a thupi na lawm lawm e!

²⁰Amau chu la humbitna lîm ah sêlgu’n, mihingte guanggalna phalo lak ah, kipat in, humbit inla tin; nialhatna lei lak ah kipat in, la bûkcha sung ah sêlgu ta’n.

²¹Gâlte’n khawpi a ûm khumnau ah ka um lai ah le, a ngilneina mak tak ei musak zing ziakin, LALPA chu chawihoi in um ta hen!

²²Kei chun lau in, “La mit mu ah kipat gamla tak ah, pai mang ah um ka hi tai,” ka la ti hial ta’n. Ahi’n, ei panpi ding ah ka kiko phatin, ka dotnate kha la he ta ahi.

²³A mithiangtho zosiate haw, LALPA chu hepi tau in. LALPA‘n mi ginum chu a humbit sek a; ahi, kisuang tak ah bawlte chu, nasa tak in a thuk kit sek hi.

²⁴LALPA ngâk zosiate haw, hât tak leh hangsan tak in um tau in.