Read Vaiphei SAM 34 Bible Online

SAM 34 - Vaiphei bible

SAM 34

¹Bangtik lai inle LALPA chu chawihoi zing ing ka tin; ama pâkna chu ka kam in pawt zing in a.

²Ka hinna’n LALPA a suang ah, thunuaigolte chun zia chu hia’n tiu in, kipak in au.

³Aw, LALPA ei choihoipiu inla, a min chawihoi khawm hitiu.

⁴LALPA chu ka hawl ah, ama’n ei dawnhu ta’n; ka launa zosia lak ah kipat in ei hukdok tai.

⁵Ama en unla, hung vâk tau in; tichun, zachakna mêl pu ta pua’n lau.

⁶Zia migenthei hi a kiko ah, zia chu LALPA‘n a hia’n, a lungdonna zosia lak ah kipat in a hukdok tai.

⁷LALPA kichate chu a vansawlchâk in a ûm kîmvêl hen, a hukhing sek hi.

⁸Aw, LALPA phat dan chu tep in hechian ma tiam un; ama bêlte chu mi hampha a hiu.

⁹Aw, a mithiangtho zosiate haw, LALPA chu lau un; ama laute chun tâksap him him a nei puau hi.

¹⁰Sakeibaknei vanglaite chu, tasam in, a gil uh a kial sek hi; ahi’n, LALPA hawlte chun vang, thilpha a tasam ngai puau hi.

¹¹Aw, naupangte haw, hung unla, ka thu ngai tiam un; LALPA lau dan hun hil ing ka.

¹²Damsawt nuam a, a damsung ah, thilpha mu zing nuam chu kua a hem?

¹³La lei gitlona lak in vengpha’n la, la mûk chule thepna thu gen lo dingin huktup in.

¹⁴Gitlona nusia’n la, thilpha bawl in; kichamna hawl inla, a del in del mai in.

¹⁵LALPA mit chun midikte a en sek in, a kiko thawm uh he ding in a bil le a daw sek hi.

¹⁶Thil phalo bawlte het zingna, lei ah kipat hi’mangthai dingin, LALPA mai chun a do zing hi.

¹⁷Mi dikte’n panpi’na a dot si’n uh leh, LALPA‘n a la hia’n, a lungdonnau zosia ah kipat in a hukdok sek hi.

¹⁸LALPA‘n lungthim ah kisik ngawi ngawite chu a nai sek in, kinepna neilote chu a hukdok hi.

¹⁹Haksatna tam tak mi dik in a tuak ding a um in, himaleh, zia zosia pat chun, LALPA‘n a hukdok sek hi.

²⁰A gu zosia a vop pha’n, pakhat chale khetbot hipua’n a.

²¹Thil phalo in migilote a that in, midik mudate chu thiamlo chang in au.

²²LALPA‘n a suakte hinna a tandok sek in, ama bêl taphot thiamlo chang pua’n au.