Read Vaiphei SAM 35 Bible Online

SAM 35 - Vaiphei bible

SAM 35

¹LALPA, ei kilanpite chu nang in kilanpi inla, ei do-te chu nang in do ta’n.

²Phawlian leh phawneu chu tu’n la, ei panpi dingin hung kipan ta’n.

³Cheicha zukdok inla, ei delte khaw zui in; ka hinna kiang ah: “La hukhingpa ka hi,” ti’n gen in.

⁴Ka hinna sukmanthai gua hawlte chu, sukmualpho ah sukjachat in um tau hen. Ka siatna ding ngaituate chu, lungdong in kile’kit tau hen.

⁵Busi hui in a taw mang gual in um uh hen la, LALPA vansawlchâk in del mang ta hen!

⁶A lampiu thim in nâl hen la, LALPA vansawlchâk in delzui ta hen.

⁷A ziak bei in ka awkna ding lên a gûk in a phau ah; a ziak bei in ka kiaklutna ding kawkhûk a cho ui.

⁸A hetlo kâl un a chung un siatna tung hen. A lênthâng kam un amau awk uh hen la, ke’lut in siatna tuak tau hen.

⁹Ziaphat chuleh, ka hinna hi LALPA chung ah kipak intin, a hukdawna ziakin kipak ta’n a.

¹⁰Ka gu leh châng zosia hin: “Aw LALPA, nang in migenthei chu, a la’n zaw guallote lak ah kipat in la hukdok in, genthei leh tasamte amau hi’gampa lak ah hukhingpa, nangma gual kua a hem um ngai,” hun ti’n au.

¹¹Ka siatna ding hawl in hiatpite a ding un; ka thil het ngailote ei dong sek ui.

¹²Ka phatna siatna’n ei dit un, ka hinna a thawmhau hi.

¹³Ke’n vang, a damlo lai un saidip puan ka sil a; anngawl ah kihigenthei in, ka lu siphûm in ka pauchap a,

¹⁴ka gualpha a hem, ka suapi a hem â ding ah thûm leh mau gual in; a nu sûn ah kapte gual mai ah lu kûn in ka mau hi.

¹⁵Ahinla, kipalna khat ka nei leh a kipak un; ei do dingin a hung kikhawm un; ka het ngai lo migilo hon in chawlnga lo in ei vuau ah;

¹⁶daidawpna pang lo hial in nuizatbûk in ei mang un, ei huatnau ziak un a hau ei gawi khum ui.

¹⁷Aw LALPA, nang in bang chan a hem la et ding? Ei bawlsia zingte ah kipat hin ei hukdok inla, zia sakeibaknei hon lak ah kipat hin ei hukdok ta’n!

¹⁸Ziaphat chuleh, kikhopna lopi tak ah chun, kipak thu hun gen ing ka tin; mi tampi lak ah chun hun pakcha ta’ng ka.

¹⁹Ka mêlmate’n diklo tak in ei ki-uankhum kiu hen la; a ziak bei ah ei mudate’nle ei ensâl diak kiu hen.

²⁰Kichamna thu him him a gen puau in, zia gam ah um muang hiat hiatte siatna ding, thu phalo ngen a gen ngal un.

²¹A kam uh ei kât khum un, “Chei, Chei, I mit un I mu tau,” a tiu hi.

²²Aw LALPA, nang in la mu tai, thipsan lo hial in! Aw LALPA, ei gamlat kin!

²³Ka Pathian leh ka LALPA, ei panpi dingin kipan inla, hung kichokphûl ta’n!

²⁴Aw LALPA, ka Pathian, la dikna dungzui in ka dik zia latsak inla, amau chun ei nuaisia kiu hen.

²⁵Amau chun, “Chei kha, I lungtup uh I mu tau,” ti kiu hen; “Ama chu I val zo tau,” le ti diak kiu hen.

²⁶Ka siatna chung ah kipakte chu, mualpho leh buaisiau hen la; ka chung ah kiletsakte chu, mualphona leh zachatna’n tuam tau hen.

²⁷Ka dikna chung ah kipakte chu, lim leh kipak ah kiko in: “A suak vangphatna chung ah kipak sek LALPA lopi chu, chawihoi in um hen!” ti zing tau hen.

²⁸Tichun, nitum in ka lei hin la dikna thu gen in, la pâkna La sa ta’n a.