Read Vaiphei SAM 37 Bible Online

SAM 37 - Vaiphei bible

SAM 37

¹Mi nunsiate ziakin kihilungngai kin la, diklo tak ah bawlte chule êng diak kin;

²hampa gual in hung tuai pai intiu in, hampa hing gual in hung vuaitha pai ding ahi ngal un.

³LALPA chu ging inla, thilpha bawl ta’n; tichun, zia gam ah hin bit tak in um zing ta’n.

⁴LALPA ah chun kipak inla, tichun, la lungthim duthusamte chu hun pia’n a.

⁵La umdan ding chu LALPA chung ah nga’n la; ama ging in, ama’n hun bawl piak sik sek na’n a.

⁶La dik zia chu vâk gual in hun latsak intin, la thiamchan zia le sûn lai gual in hun tâk lang in a.

⁷LALPA âng ah thipbek in um inla, ama ngâk ham ham in; thil phalo a matchâk ziak ah, vangphatna changte ziakin, nang leh nang kisulungngai kin.

⁸Lungnat kisûm inla, thangtawmna haisan in. Kihilungngai kin, zia chu siatna bul ahi.

⁹Mi nunsiate chu paithâk in, hung um ding ahi ngal un; LALPA ngâkte chun vang gam hi la lua’n au.

¹⁰Chomlo kâl sung in mi nunsia chu um ta pua’n tin; a umna mun gunchu tak in hawl male chin, a la um talo ding ahi.

¹¹Thunuaigolte chun vang gam hi lua in au; vangphatna nasa tak chên in au.

¹²Mi nunsia chun midik siatna ding guanggal in, a ha a gawi khum in;

¹³ahi’n, LALPA‘n mi nunsia chu nuisan intin; a manthaina ding ni hung tung ding ahi ti a mu ngal a.

¹⁴Gentheite leh tasamte nuaisia ding leh, dik tak ah umte that dingin, mi nunsiate chun a chemjam uh jukdok in, a thalpiu a lawi un;

¹⁵a chemjam un amau lungchang ma ma sun intin, a thalpiu chule bong in a.

¹⁶Mi nunsia thil tam tak neite sâng in, midik thil tawmcha neite chu a phazawi.

¹⁷Mi nunsia khutbân chu sukbot in um intin; midik vang LALPA‘n a tuzing hi.

¹⁸LALPA‘n dem kâi lo mite hinkhua chu a hezing in, a go unle kumtuang dai intin;

¹⁹hun phalo ah mualpho pua’n tiu in, kial hun inle kiningting in au.

²⁰Mi nunsiate vang mangthai intiu in, LALPA do-te chu gantatna mun ah, hampa seldawng gual mai hi’n au; meikhu gual in mangthai kawm ta’n au.

²¹Mi nunsia chun a thunglâk ah, a dit kit ngai pua’n; midikte vang huangphal in thilpiak a thanuam ui.

²²LALPA maljawlna dongte chun gam hi lua intiu in, a sapsiatte chu mangthai in au.

²³LALPA jal in mihing in kãl a suan in, a lung lam ah kalsuante chu a hidet sek hi;

²⁴kisui sek maleu hinle, kilîk den puai tiu; LALPA‘n I khutbân un ei tuzing ngal a.

²⁵Naupang ka la hita’n, tu’hin chu teksia ka hung hi tai; ahi’n, midik nutsia ah um leh, a suante an don le ka mu nai diak puai.

²⁶Huangphal tak in a piau in, a thunglâksak un; a suanteu le maljawlna a hisek ui.

²⁷Nunchan phalo haisan inla, thilpha bawl ta’n; tichun, kumkhua’n um zing inla,

²⁸LALPA‘n vaihawmna dik a ngaina ngal a; a mi ginumte nusia ngai pua’n a. Midik chu kumtuang ah vop phatin um intin, mi nunsia suan leh pâkte vang chu mangthai in au.

²⁹Midikte chun gam hi lua in, kumtuang in chêng in au.

³⁰Midik kam chun pilna thu a sêkdok sek in, a lei inle vaihawmna dik a sêkdok sek hi.

³¹A Pathian dan chu a thinlung un a um in; a kalsuan uh le teu pua’n a.

³²Mi nunsia chun midik chu a en-gu zing in, a tha’na ding lemchâng a hawl zing hi.

³³LALPA‘n a khut in nusia pua’n tin, vai a hawm tak leh le thiamlo chansak phal pua’n a.

³⁴LALPA ngâk inla, a lampi haw zing in; gam chu lua dingin hun chawihoi in a; tichun, mi nunsiate siatna chu a la mu’n la.

³⁵Mi nunsia leh khel tak, sidar thing gual ah mi zosia tawden ah, kiletsak ka la mu’n.

³⁶Chuleh, ka vak khêl phat in, a bei kit ta mai a; hawl hawl maleng mu phâk ahi ta puai.

³⁷Dem kailote tepte inla, midiktat chu kansui in: kicham nuamte chun suan leh pâk, tasam lo ding ahi ngal un.

³⁸Himaleh, thil hi’khialte chu, hisiat ah um ding a hiu in; mi nunsia suan leh pâkte chu jikbul in au.

³⁹Mi dikte hukdamna chu LALPA ah kipat ahi’n; ama chu a lungjin lai ua kisêlna kulpi ahi.

⁴⁰LALPA‘n amau chu panpi in, a hukdok sek in, ama a bêl ziak un, mi nunsiate lak ah kipat hukdok in, a hukhing sek hi.