Read Vaiphei SAM 41 Bible Online

SAM 41 - Vaiphei bible

SAM 41

¹Mi genthei kaituate chu mi hampha a hiu; a lungjin hun leh LALPA‘n hukdok in a.

²LALPA‘n humbit in, hawi intin; lei ah mi hampha hi’n au. A mêlmate’n a nop nop uh, a law ding un pedok pua’n la.

³LALPA‘n a damlona jalkhun unle hihât intin; a damlo lai unle a natnau zosia sukdam piak in a.

⁴Ke’n vang, “Aw LALPA, ei hepi inla, ei damsak ta’n; la chung ah thil ka la hikhial ta ngal a,” ka ti’n.

⁵Ka mêlmate’n ei thangsiat man un, bangtik leh a thi’n, a min a mang dia aw, a ti sek ui.

⁶Ei kantha’ hungte chule, zuau thugen bep a hiu in; ka chungchâng thu phalo lakhawm leh, a chiana taphot ua genjakte a hiu.

⁷Ei mudate chu ei gensia’n a kihogu sau sau un; siatna tawp khawk ka tuakna ding a ngaitua sek ui.

⁸“Thi’na ding natna’n a tâkbuak ta hen, tu’ a lupna kipat hin thodok kit ta pua’n a,” a tiu a.

⁹Ka gual ngai pen, ka ginchak ma ma, ka vaithum nêkpi natiang in, ka siatna ding tup in, a kengtaw ka chung in a lâm tai.,

¹⁰Himaleh, aw LALPA, nang in ei lungsiat inla, amau ka thuktheina dingin ei kaitho kit in.

¹¹Zia hin ka chung ah lungdam la hi ti ka hia’i, ka mêlmate zaw ah lei umsak lo ziak ‘hin.

¹²Ka lungthim thiantho ziakin lei tuzing ah, kumtuang ah la kiang ah um dingin lei koi ta ahi.

¹³LALPA, Israel Pathian chu, kumtuang ah kipat kumtuang tiang in, chawihoi in um ta hen. Amen, Amen.