Read Vaiphei SAM 44 Bible Online

SAM 44 - Vaiphei bible

SAM 44

¹Aw Pathian, ka pu leh pateu khang ah, la thilbawl ei hilteu kha, ka nakhang un ka la he tau a;

²la khut in nam dangte la deldok a, amau la phu ta’n; namdangte la hi’genthei ah, amau vang la maljawl hi:

³a chemjam ziak uh hilo in gam hi la zawsak a; amau bân thahât ziak bep ah kihukhing a hipuau hi; amau la doisakna ziakin la khut changlam leh, bân thahât leh la mêl vâk in a hizawi.

⁴Nang ka Lal leh ka Pathian la hi; nang in, Jakob zaw’na thu la piai.

⁵Nangma ziakin ka mêlmateu ka sawnpâi sek un; la min ziakin ei do-te ka chuan chil sek ui.

⁶Ka thalpi ka suang pua’n, ka chemjam inle ei hukhing thei diak puai.

⁷Ei do-te lak ah kipat nang in lei hukhing zaw’n, ei mudate chu la sulungjing tai.

⁸Pathian suang zing ing ka tiu in, la min chu kumtuang in chawihoi ing kau. (Selah)

⁹Tu’hin vang nang in ei pâm pai in, lei tawden tai; ka sepaiteu la kitonpi nuam ta puai.

¹⁰Mêlmate âng in lei jamsiat sak ah, ka mêlmateu in gâl lâk in ei chomgam tau hi.

¹¹Belam thalup ding gual in lei bawl ah, namdangte lak in lei thêchek zo tai.

¹²La mite hi man tawmcha’n la zuakah, man bei gual in la khawng tai.

¹³Ka Invêngte hakva tawtna’n lei koi a, ka hianghei mite tawtbûk leh simmaw in lei siam tai.

¹⁴Nam tin lak ah mi gensim in lei siam a, mi tin lak ah nuizatbûk in lei siam tai.

¹⁵Nisi’n jakcha’n ka um ah, mualphona’n ei khû zing a;

¹⁶ka mêlma leh phuba latu mit mu in, ei gensete leh ei simmawte hosiat in ka um hi.

¹⁷Zia zosia chu ka chung un a tung a, ahi’n la, ka hun hemil puau in, la thuthung le ka botsia diak puau hi.

¹⁸Ka hun kilepsan ngai puau in, la lampi le ka pêtsan ngai diak puau hi;

¹⁹ahi’n, si-al hon lak in lei koi a, thim sâ tak in lei tuam nalai hi.

²⁰Ka Pathian min uh ka hetmil khâk pal ua, gamdang pathian lam ah ka khutteu ka jak uh chun,

²¹Pathian in zia chu ei mudok lo ding a hem? Ama’n lungthim gûk zosia a hesuak ngal a.

²²Nangma ziakin nitum ah tha in ka um zing un, belam thalup ding gual ah ngai ka hiu.

²³Aw LALPA, hung thodok in! Bang ding ah ipmu la hem? Hak inla, kumtuang in ei pâm pai kin!

²⁴Bang ding ah la mai sêlmang la hem? Bang ding ah ka gentheinau leh, nuaisiana ka thok uh hi hemil la hem?

²⁵Ka hinnau leivui lak ah sîtden ah um in, ka taksau le lei tual tawh a kimat den hial tai.

²⁶Tho inla, kei uh panpi dingin hung in! La ngilneina ziakin kei uh ei hukdam ta’n!