Read Vaiphei SAM 49 Bible Online

SAM 49 - Vaiphei bible

SAM 49

¹Mi zosiate haw, zia hi hiau in! Khawvel ah um zosia,

²mineu leh milian, mi hausa leh migenthei inle. La bil uh a la daw un.

³Ka kam in pilna thu gen intin, ka thinlung ngaituanate chu, hiatthiamna thu hi hen.

⁴Thupil lam in ka bildaw ing ka tin; ka thugil gen chu tingtang in hilchiansak ing ka.

⁵Ei bawlsiate khawlona’n ei ûm kîmvêl in, buaina’n ei chup lai inle,

⁶a hausaknau muang ah, a neinungnau thupi tak kisuanpite chu, bang a hem ka lau ding?

⁷Kuama’n a hinna man ding pia thei pua’n tin; Pathian kiang ah hinna man ding kuama’n pe zo pua’n a.

⁸Thi’na tuak lo ah kumkhaw sawt ah a hintheina ding un,

⁹mihing hinna tatna ding chu a man a tam ma ma in, piak tin zaw ding gual ahi puai.

¹⁰Mipil I vak et leh a thi tho un; mingol leh mimawlte le a thi gêl ui, a hausaknau mi dangte â dingin a nusiau hi.

¹¹A min un gamte nei in, a Inteu chu suan zosia tiang ah, um ding gual in gêl maleu, a thân uh chu a kumtuang In ding uh a hung hi tai.

¹²A thithei mihingte lopi tak in, um zing thei pua’n tiu in; a thi pai ziang ding gancha gual bep a hiu.

¹³Zia chu ngolhuai tak ah kimuangte thilchan chu ahi’n, a thil neiteu ah kihi’lung-awite tawpna ding chu ahi.

¹⁴Belam gual ah Sheol â ding ah guat a hiu. Thi’na chu amau chingtu hi’ntin; zang tak in thân a zuan suk un, a mêl uh le bei ngal ta’n a; tichun, Sheol chu a In uh hita’n a.

¹⁵Ka hinna vang Pathian in, Sheol thilhitheina lak ah kipat in tandok intin, ama’n ei la lop ding ahi ngal a.

¹⁶Mi hi’hausak ah a hung um ah, a In sung nei leh lam a hung pun tul tul inle lau kin.

¹⁷A thi tak uh leh bangmacha somdok lo ding ahi ngal un; a hausaknau chunle zuisuk lo ding ahi.

¹⁸A damsung un nuamsa’n kingai maleu, min ama â ding ah thilpha a bawl leh, hun pakcha sek maleu,

¹⁹a pu leh pateu kiang in kile’kit intiu in, bangtik inle vâk hi mu kit ta pua’n au.

²⁰A thithei mihingte lopi tak in um zing thei pua’n au; a thi pai ziang ding gancha gual bep a hiu.