Read Vaiphei SAM 5 Bible Online

SAM 5 - Vaiphei bible

SAM 5

¹Aw LALPA, ka thute hi a la ngai inla, ka thûmna ngaisak ta’n.

²Ka Lal leh ka Pathian, ka hun kona aw ngaitha’n la, la kiang ah pauchap ka hi’ngal a.

³Aw LALPA, jingkal in ka aw la hesek ah, jingkal in ka dotna la ma’n ka hun tut ah, ka la hu’ngai sek hi.

⁴Nunsiatna kipakpi Pathian la hipua’n; phatlona chun hun kitonpi pua’n a.

⁵Mi chapote chu la mit mu in hung ding ngai pua’n tiu in; thil phalo bawl zosia chu la hua ahi.

⁶Zuau gen mite chu hi’mangthai in; LALPA‘n thisan sua mang mi leh, mi thephatte chu a ki’dak hi.

⁷Kei vang la ngilneina nasa tak ziakin, la In ah hung lut ing ka tin; nangma ja na’n, la tempul thiangtho lam nga’n bokkhup ing ka.

⁸Aw LALPA, ka mêlmate ziakin la dikna’n ei pui inla; la lampi ka ma-âng ah hin hi’lamzang ta’n.

⁹A kam un ginumna a um pua’n; a lunggil uh siat bawlna ngen ahi’n; a gawl uh thân kihongsa ahi’n; a lei un mi a lêm in a pâkcha sek ui.

¹⁰Aw Pathian, a gitlo man uh puaksak inla; a thil guanggalnau ah chun amau ke’lut uh hen la; a hi’khelnau tam tak ziakin paidok in, la chung in a hel ta’ngal un.

¹¹Nang hun bêl zosia kipak uh hen la; kipak ziakin La sa zing tau hen. La vênbitna a chung un jak inla, la min ngaina zosiate chu, nangma ah lim tak in um tau hen.

¹²Aw LALPA, nang in midik chu la maljawl ngal ah; amau chu phaw gual in doisakna’n la thuam tai.