Read Vaiphei SAM 51 Bible Online

SAM 51 - Vaiphei bible

SAM 51

¹Aw Pathian, la ngilneina dungzui in, ka chung ah ja’ngai inla, la lainatna dungzui in ka hi’khelna thaimang ta’n.

²Ka khawlona kipat in ei sawp thiang inla, ka gitlona hile ei silthiang ta’n.

³Ka hi’khelnate ka he ta hen, ka gitlona ka man a um zing hi.

⁴La chung ah, nangma chung ngei in, thil ka la hi’khial ta’n; la mit mu ah thil diklo ka la bawl tai; tichun, la thugen ah thiam chang ah, vaihawmna le demna bei la hi’theina dingin.

⁵Ngaitia, khawlona hin ka hi, ka nu’n ei vop ah kipat in, migilo ka la hi tai.

⁶Sunggil lam ah takna la dawi hi; tichun, ka lunggil sung ah hin pilna ei zilsak ta’n.

⁷Husop in ei silthiang inla, tichun, thiang ta’ng ka tin; ei sil in, tichun, vûk sâng in vâm zaw ta’ng ka.

⁸Limna leh kipakna ei hiatsak inla, ka gu la gawtnawite hi lim kit tau hen.

⁹Ka gitlona lak ah kipat la mai sêl inla, ka khawlona zosia thaimang ta’n.

¹⁰Aw Pathian, keima ah hin, thinlung thiangtho siam inla; ka sung hin thagau thak leh dik koi ta’n.

¹¹La kiang ah kipat ei paidok kin la, la thagau thiangtho hi ei lâkpiak kin.

¹²La hukdam limna chu ei pia kit inla, la thu mang zing thei dingin ei vop in.

¹³Tichun, dan botsete chu la lampi hil ing ka tin; la kiang lam ah mi gilote hung kit ta’n au.

¹⁴Aw Pathian, nang, ei hukhingpa, ka Pathian, thisan sua’na lak ah kipat, ei hukhing inla; chutichun, ka lei hin lei hukdawna thu, ngai tak in la’n sa’n a.

¹⁵Aw LALPA, ka kam ah thu ei gen dawsak inla, tichun, nangma hun pâk ing ka.

¹⁶Kithoina chung ah kipakna la nei paw’ngal a; hâlmang thillat hun pelengle pom lo ding la hi’ngal a.

¹⁷Pathian pom tâk ah kithoina chu, gitlona kisîk hi ahi’n; aw Pathian, lunggil kingainiam leh, kisik ngawi ngawi hi musit pua’n la.

¹⁸La duthusam gual tak in, Zion chung ah thilpha bawl inla; Jerusalem bângte hi tungding kit ta’n;

¹⁹tichun, kithoina dik tak, hâlmang thilpiak leh hâlmang pumpiak chung ah hin, kipak ta’n la tin; ziaphat chuleh, la mâichâm ah, bawgchalte lat hita’n a.