Read Vaiphei SAM 52 Bible Online

SAM 52 - Vaiphei bible

SAM 52

¹Aw mihat, bang ding ah kiletsak tak ah, Pathian ngaisak mi siatna ding ngaitua sek la hem? Sun nitum in mi siatna ding la ngaitua hi.

²Mi theppâina ding bep buaipipa, la lei chu mul mêtna chem hiam tak gual ahi.

³Thilpha sâng in thil phalo, thu taksang ah zuau thu gen la ngaina zawi.

⁴Aw, nang lei mi thep mang, mi val zo ziang thei thu bep la ngaina’i.

⁵Ahi’n, Pathian in kumtuang â dingin, hun gawtnawi dim dem intin; la puanbûk ah kipat hun jukdok in, hun puaitel in a; mihingte gam ah kipat hun botdok in a.

⁶Midikte’n zia chu mu’n tin uh lau in, a thilbawl chu nuisan in:

⁷“Entia, Pathian kisêlna mang nuam lo a, ama hausakna muang zaw, ama nei leh lam suang zaw te hi,” ti’n au.

⁸Kei vang Pathian In ah Oliv thing no dip dep gual ka hi. Pathian ngilneina chu kumtuang, kumtuang in ka muang hi.

⁹Kei â ding ah zia chu lei bawl piak ziakin, kumtuang in la chung ah kipak thu gen ing ka. Mi ginumte lak ah chun la min puangjak ing ka; zia chu a pha ngal a.