Read Vaiphei SAM 55 Bible Online

SAM 55 - Vaiphei bible

SAM 55

¹Aw Pathian, ka pauchapna hin bil hun daw inla; lungsiat ka dot lai hin ei kisêl mangsan kin.

²Ei ngaitha’n la, ei dawnhu in; ka lungkhamnate ziakin ka buai gawp tai.

³Mêlma husa ziak leh mi nunsiate tângsap khum ziakin, theplau in ka um tai. Ka chung ah buaina hun tut in, lungna’n ei do ui.

⁴Ka sunggil hin ka lungthim a na ma ma in, thi lau umnate chu ka chung in a hung tung tai.

⁵Launa leh kithinna’n ei tun khum ta’n, dipdapna’n ei chup mang tai.

⁶“Vakhu gual ah tha nei hita ve leng aw! Leng mang in thamuang tak in um ta’ng ka;

⁷gamla tak in leng mang ing ka tin, gamthip ah vaum mang ta’ng ka tin; (Selah)

⁸thigawpi leh huipi hât tak hi, kisêlmang san ziang leng,” ka ti’n.

⁹Aw LALPA, buaisak inla, a lei uh buai gawpsak ta’n; khawpi sung ah kipawngbawlna leh kinakna ka mu ngal a.

¹⁰A sûn a jan in khawpi kulbâng chung in, a vâk tawl tawl un; a sung chu khawlona leh buaina’n a dim ta’n,

¹¹khawlailung in siatna a um in; ki-ênggawtna leh kilepbawl na’n, a khawlai a pawtsan ngai puai.

¹²Ei gensete chu ka mêlmate ahi puau in, hizaw maileu chu thuak thei zaw ding ka hi’n; ka chung ah kiletsakte chule ei do-te a hipuau, hizaw maileu kisêlmangsan mai ding ka hi’n.

¹³Himaleh, nang ka kibatpi, ka gualpa, ka pawlnêlsa la hi’ngal in;

¹⁴nuamsa tak ah ka la kivoppisa, mipite tawh Pathian biak In ah, ka la kitonpisa chu la hi.

¹⁵A chung un thi’na tung hen la, a hingsan un Sheol ah lût uh hen; a Inteu leh a lungthimteu ah, gitlona a chêngden ngal a.

¹⁶Ke’n vang Pathian ka ko ah, LALPA‘n ei hukdok ding ahi.

¹⁷Nitâk hileh, jingkal hileh, sun inle ka lungjinna thu gen in, pauchap ing ka tin; tichun, ama’n ka aw ngaitha’n a.

¹⁸Ei do ding ah kisala tam maleu, kido’na lak ah ka hinna bit tak in hukdok intin,

¹⁹Pathian, kumtuang ah kipat lal ah chupa chun, ngaitha’n tin; a tawidan uh sâng lo ah, Pathian a lau lo ziak un, nuaisia ta’n a.

²⁰Ka lawipha chun a lawite chung in a khut a lek a; a thuthung a botsia tai.

²¹A kam chu bawngnawi khal sâng in a zol zaw’n; a lunggil un vang do lung a pu zing ui; sathau sâng ah zol zaw’n thu a gen un, ahi’n, chemjam jukdoksa a hiu.

²²La puakgik chu LALPA chung ah nga lechin, ama’n hun hihat in a; midik chu bangmatik in hilîng phal pua’n a.

²³Himaleh, aw Pathian, nang in amau chu manthaina kawkhûk ah, pai lut in la tin; thisan sua mang leh thep mang mite chu, a dam sung ding uh kimkhat le dam zo pua’n au. Ke’n vang nang bep muang zing ing ka.