Read Vaiphei SAM 56 Bible Online

SAM 56 - Vaiphei bible

SAM 56

¹Aw Pathian, mihingte’n tawden ei guat tâk ziak un, ka chung ah ja’ngai in; nitum in mêlmate’n ei engbawl zing un;

²ka mêlmate’n sun nitum in ei chuanchil un, mi tam tak in ei bom ui.

³Aw Chungnung Penpa, ka lau phat si’n leh hun ging ing ka.

⁴A thu ka pâkchat zing Pathian ah chun, lau lo in kinga’ng ka, mihing in bang ei law thei ding a hem?

⁵Nitum in ka siatna ding a hawl sek un; a ngaituanau zosia le ka siatna ding ngen ahi.

⁶Kinakna ding hawl in ei chângguu ah, ka tawidan zosia ei ensui ui. Ka hinna lâkmang ding gua a kinem ui.

⁷Aw Pathian, la lungnatna’n namtin, a gitlonau chu dit kit inla, paitha ta’n.

⁸Nang in ka vâkvaina zosia la tepte ta’n; ka mitthi tui kia hi, savun pêng in koi in. La tepte’na lekhabu ah chun a umna hilo a hem?

⁹Ka hun ko phat leh ei do-te chu taijak ta’n au. Pathian in ei panpi hi ti ka hia’i.

¹⁰Pathian ah chun a thu pâk ing ka tin, LALPA ah chun, a thu ka pâk hi;

¹¹Pathian ka ging hi, ka lau puai, Mihing mai mai in bang ei law thei ding a hem?

¹²Aw Pathian, la kiang ah ka thutiamte chu, mualsua ngei ngei ing ka; kipak thu genna thillat, la kiang ah hun pia’ng ka.

¹³Ka hinna hi thi’na kipat in la hukdok ta’n; ka keng le kipûk lo dingin la veng bit ta’n, tu’hin chu, hinna vâk ah Pathian ma ah chia thei ta’ng ka.