Read Vaiphei SAM 59 Bible Online

SAM 59 - Vaiphei bible

SAM 59

¹Aw ka Pathian, ka mêlmate lak ah kipat ei hukdok inla; ei do-te lak in ei humbit in.

²Thil phalo bawlte leh thisan sua mangte lak ah, kipat in ei hukdok in.

³Tu’hin le ka hinna ngâk in ei chânggu zing un; mihatte chu ei soisa dingin a pung khawm ui.

⁴Aw LALPA, keima bawlkhialna leh, ka gitlona ziak le hilo in, a tai un, a kisa zo tau hi. Hung kipan inla, ei panpi dingin hung inla, en tiam in!

⁵Aw sepai honte LALPA Pathian, Israelte Pathian chu la hi. Namtin gawt dingin hung kipan in; mi gûkkhel thil phalo guanggalte, zosia chu hawi kin.

⁶Nitâk si’n leh uicha hon, khawpi sung ah kiu veng vung, nêk ding hawl ah tai vêl gual in, a hung kit sek ui.

⁷Zia tak ah chun a kambêm ua kiko in a hâm un, a lei ua thu chu chemjam hiam tak gual ah pawt in: “Kua a hem ka thugen he?” a tiu a.

⁸Himaleh, aw LALPA, nang in amau chu la nuisan ah, namtinte chu tawtbawlna’n la mang tai.

⁹Aw, ka hâtna, hun ngâk zing ing ka; Aw Pathian, nang chu ka kulpi la hi’ngal a.

¹⁰Ka Pathian in ka chung ah, a ngilneina dungzui in ei la tuak intin; Pathian in ka mêlmate chung ah, ka gualzawna ei musak ding ahi.

¹¹Aw LALPA, ka phawu, amau chu that ziang kin; achutiloleh, ka mipite’n hemil ziang kha’n au; la thil hitheina’n buaisak inla, kainiam in.

¹²A kam ua a gitlo ziak leh a lei ua thu pawtte ziakin, a chapona thâng un awk tau hen. A hânsia lawnau leh a zuau thu gendokteu ziakin,

¹³la lungnatna’n himangthai inla, amau chu hi’mangthai suak ta’n. Tichun, Pathian in Jakobte Inkuan chung in, vai a hawm hi, ti kawlkil tiang in he ta’n au.

¹⁴Nitâk si’n leh uicha hon, khawpi sung ah kiu veng vung ah, nêk ding hawl ah tai vêl gual in a hung kit sek ui.

¹⁵An hawl in a vâk vêl vêl un, a vâ kham uh a mulo uh leh a ngîk sek ui.

¹⁶Ke’n vang, la hatna thu la’n sâng ka tin; jingkal ah chun la ngilneina la’n sâng ka. Nang chu ka kulpi sâng leh, ka lungjin ni ka kihumbitna la hi.

¹⁷Aw ka hatna, nangma pâk in La sâng ka tin; nangma ka Pathian leh ka kulpi sâng, ka chung ah ngilnei Pathian chu la hi.