Read Vaiphei SAM 62 Bible Online

SAM 62 - Vaiphei bible

SAM 62

¹Ka hinna hin thipbek in Pathian bep a ngâk a; ama ah kipat in ka hukdamna, hung pawt ding ahi ngal a.

²Ama bep chu ka suangpi, ei hukhingpa leh ka kulpi ahi’n; kilîng him him pua’ng ka.

³Nanghaw zosia’n tha dingin bang awn gual leh, pal pûkvâng vâng gual in, bang chan a hem mi pakhat la soisak ding uh?

⁴Mi pakhat dinmun sâng tak ah kipat, sotthâk ding bep a ngaituau a. Zuau thu gen a thatnop lam tak uh ahi; a kam un doisakna a piau a, himaleh, a lunggil tak un, hânsia a law sek ui. (Selah)

⁵Ka hinna’n thip bek in Pathian bep a ngâk ah; ka kinepna chu ama ah kipat ahi ngal a.

⁶Ama bep chu ka suangpi, ei hukhingpa leh ka kulpi ahi; kilîng pua’ng ka.

⁷Pathian ah chun ka hukdamna leh ka lopina a um in; ka hâtna suangpi leh ka kisêlna chu Pathian ahi.

⁸Aw mipite haw, ama chu ging zing un, la thinlung gil teu a ma’n sungdok unla; Pathian chu I kisêlnau ahi. (Selah)

⁹Mi nuainungte hi hu kithâdok tawhbang bep a hiu in, miliante hile kithepna mai a hiu. Bûkna’n a kikâng gêl un, a paniu inle hu kithâdok sâng in, a jang zaw nalai ui.

¹⁰Thagum ah mi lâkpiak hi kimuanpi kin la, misuam hile kisuanpi diak kin; hausakna a hung pun inle, a chung in la lungthim nga diak kin.

¹¹Pathian in khatvei a gen ah; zia chu nivei ka he ta’n: thuneina chu Pathian â ahi’n,

¹²aw LALPA, ngilneina hi nang â ahi. Mi tin a nasep dungzui un la din sek ngal a.