Read Vaiphei SAM 63 Bible Online

SAM 63 - Vaiphei bible

SAM 63

¹Aw Pathian, nang chu ka Pathian la hi’n; hun hawl ing ka, ka hinna hi nangma thangai in a dangchâk a; tui umlo’na gamkeu leh dangkeuna mun ah hin, ka taksa hin a hun thangai tun tun ahi.

²Tichun, mun thiangtho ah la thilhitheina leh, la lopina mu dingin ka hun en zing hi.

³La jaidaw thei dan hi, hinna sâng ah a phat zawk ziakin, ka mûk in hun pâk ding ahi.

⁴Tichun, ka dam sung sia’n hun pâk ing ka tin; ka khut jak in la min hun ko ing ka.

⁵Ka hinna hi luai lopi tak ûm gual in a tai ah, ka kam hin limna mûk in a hun pâk in,

⁶ka jalkhun laijawl ah nang ka hun ngaitua ah, janven si’n ah nangma ka hun pawl zing lai ah chun;

⁷nangma ei panpipa la hi’ngal a, la thalîm nuai ah chun lim in La sa ding ka hi.

⁸Ka hinna nangma ah a bek den zing a; la khut changlam in lei kaibât zing hi.

⁹Ka hinna hi’mangthai gua ei hawlte chu vang, lei nuainung pen ah chun lut intiu in;

¹⁰chemjam thil hitheina kiang ah piak hi’n tiu in; si-alte nêk ding bep hita’n au.

¹¹Lengpa vang Pathian ah lim intin; ama min ah kitiamna nei zosia chu, kipak intiu in; mi zuauthei te kam chu, hukbit in um ta’n a.