Read Vaiphei SAM 69 Bible Online

SAM 69 - Vaiphei bible

SAM 69

¹Aw Pathian, ei hukhing in! Tui in ka ngawng tiang a chup tai.

²Tawchâk ding umlona buanthuak, thûk tak in ka tum ta hen, tui thûk tak in ka lût ta hen, tuisânglêtte chun ei chup mang tai.

³Ka hun ko’na lam in ka chau ta’n, ka gawl a heu hial tai. Ka Pathian ngâk ah ka etna lam in ka mit a vai zo tai.

⁴A ziak bei ah ei mudate chu, ka luchang ah ka samzang sâng hinle a tam zaw hial ui; ei hi’mangthai gua, diklo tak ah ei hêk ka mêlmate chu a tam ma mau hi. Ka gûk lo pi chu bang ding ah dit ding ka hem?

⁵Aw Pathian, nang in ka ngol dan hi la hia’i; ka thilbawl khialte chu la ma’n sêlguk ahi puai.

⁶Aw LALPA, Sepai honte PATHIAN, keima ziakin nangma ah kinepna chu, mualphosak him him kin; Aw Israelte Pathian, keima ziakin nangma hawlte chu mualphosak kin.

⁷Nangma ziakin gensiat ka hi’n, zachatna’n ka mai a khû zo tai.

⁸Ka chanaute lak ah malzin ka hung hita’n, ka nu chate lak ah gam dang mi ka hung hi tai.

⁹La In ah ka phatchuam ngaina’n ei ne zo ta’n; nangma gensete gensiatna chu ka chung in a chu tai.

¹⁰Anngawl hial ah ka hinna ka kiniamsak inle, ei gensiatnau bep a hung hi tai.

¹¹Lusûnna saidip puan ka sil leh, a nuizatbûk uh ka hung hi tai.

¹²Kul kotkhak bul ah kichute holimna ka hung hita’n; zukhamte’n La ei phuak khum tau hi.

¹³Aw LALPA, kei vang la kiang ah pauchap zing ing ka. Aw Pathian, hun kipak um sung ah hin, la ja’ngaina ziakin ei dawnhu ta’n.

¹⁴Buanthuak lak ah tum lo dingin, la ginumna ziakin ei hukdok in; ka mêlmate lak ah kipat leh, tuili thûk takte lak ah kipat in ei ladok in.

¹⁵Tuisuagiat ei chup mangsak kin la, tuili thûk inle ei val zo diak ki’hen la, lei kawhawm inle a kam ei chip khum diak ki’hen.

¹⁶Aw LALPA, la ngilneina a phat ziakin, ei dawnhu in; la lainatna hau dungzui in ka lam hun nga’n.

¹⁷La suak hi ei kihei mangsan kin la, lungjing in ka um ah, ei dawnhu kin in.

¹⁸Ei hun nai in, ei hukdok in; ka mêlmate lak ah kipat hin ei thâdok ta’n.

¹⁹Nang in mi ei gensiatnate, ka zachatna leh musit ah ka umnate hi la he suak a; la mêlmate zosia hile la he suak sik sek hi.

²⁰Mi ei gensiatna ziakin ka tha a sia’n, nasa tak in ka lungkham hi. Ei hepi ding ka hawl in, khat chale a um puai; ei thamuan ding ka hawl in, khat chale ka mu zo puai.

²¹Ka an dingin gû ei piau a, ka dangchâk ah dawn ding uain thûk ei piau hi.

²²A luaithe’nau dawkan chu a thâng uh hi hen la, a gualteu awkna hita hen.

²³A mitteu chule a mutheilona ding un, hi’thim in um hen la; a kawngteu chu lau in kithin sak zing in.

²⁴La lungnatna a chung un buntha’n la, la lungnat siatsona chun amau delkhum hen.

²⁵A giabuk uh a hawm ah nutsia in um hen la; a puanbûk un kuama um ta kiu hen.

²⁶Nang in la engbawl sate ma chu a hi’genthei un; la hi’liamte chu huaisia zaw diak in a engbawl ui.

²⁷A gitlonau ah chun gitlona belap piak inla; nang ah kipat in ngaidamna mu kiu hen.

²⁸A min uh chu hinna lekhabu kipat in, thaimang in um hen la; midikte lak in a min uh zik lut hi ki’hen.

²⁹Ahi’n, kei chu mu’tawm leh beidong in ka um a; aw Pathian, la hukdamna chun ei vêng tup ta’n.

³⁰Pathian min pâk in La sâng ka tin; kipak thu gen in ama chu chawihoi ing ka.

³¹Zia chun bawngchal leh bawng chal kî le, tin neite sâng in LALPA kipak sak zaw’n a.

³²Thunuaigolte chun zia chu muu hen la, kipak tau hen; nang uh Pathian hawlte haw, la lungthim uh hihal in um ta hen.

³³LALPA‘n tasamte chu a ngaitua sek in; ama mi têl, mi tângte chu a mutawm ngai puai.

³⁴Lei leh van in ama chu pâk uh hen la; tuisuagiat leh a sung ah, hinna nei zosia chunle pâk tau hen.

³⁵Pathian in Zion chu hukdok in, Judah khawpite chu tungding kit ding ahi ngal a; a suakte chu zia tak ah chun chêng intiu in, nei den ta’n au;

³⁶a suakte suante chun lua ta’n tiu in, a min ngainate chu a sung ah chêng ta’n au.