Read Vaiphei SAM 71 Bible Online

SAM 71 - Vaiphei bible

SAM 71

¹Aw LALPA, nangma ka hun bêl hi; ei mualphosak kin.

²La dikna ziakin ei hukhing in; ei hukdok inla, ka lam ah la bil hun daw in ei hukhing ta’n.

³Ka kisêlna leh kulpi det, ka hukdamna ding ah thu pepa la hi’n; ka bitna suangpi leh ka kisêlna la hi’ngal a.

⁴Aw ka Pathian, mi nunsiate khut leh, mi phalo leh mi gûkkhelte dawha phalo, lak ah kipat chun ei hukdok in.

⁵Aw LALPA, ka naupan lai ah kipat ka hun muan leh, ka kinepna la hi’ngal a.

⁶Ka piandaw ah kipat in nang ah ka kinga hen; ka nu sûl ah kipat ei hukdokpa chu nang la hi. Hun chawihoi zing ing ka.

⁷Mi tam tak kihilna ka hung suak ta’n; himaleh, nang chu ka kisêlna det tak la hi.

⁸Ka kam hi nang pâkna’n a dim in, nitum in hun chawihoi ing ka.

⁹Ka têksiat nung inle ei paitha kin la; ka thakiak nung inle ei nusia diak kin.

¹⁰Ka mêlmate’n holimna’n ei mang un, ka thi’na ding hawlte a kiho-khawm ui.

¹¹Amau in, “Pathian in a nusia tai, del unla, man un; ama hukdok ding kuama a um ta paw’ngal in,” a tiu hi.

¹²Aw Pathian, ei gamlat kin; aw ka Pathian, ei hung panpi kin in!

¹³Ei hêksiate chu mualpho tak in sukmanthai hitau hen; ka siatna ding hawlte chun, mutawmna leh zachatna tuak tau hen.

¹⁴Kei vang nangma ah chun kinem zing ing ka tin, hun pakcha zaw diak ing ka.

¹⁵Kei â ding ah la phatna tam dan leh, ka hiatsen lo hiziang maleh, ka kam hin la dikna thu gen intin, sun nitum in la hukhinna thu gen ing ka.

¹⁶LALPA PATHIAN thilbawl lopi tak chu, pâkcha’n hung ing ka tin; la dikna thu, nangma dikna thu bep gen ing ka.

¹⁷Aw Pathian, ka khangdawn lai ah kipat in lei hil ta hen; tu’tiang hin la thilbawl mak takte chu, ka puangjak zing nalai hi.

¹⁸Aw Pathian, ka teksiat ah, ka samkâng hun tiang inle, la hatna thu hi khangthak, hung um nalai dingte zosia kiang ah, ka tâklat masangsia ei nusia kin.

¹⁹Aw Pathian, la thilhitheina leh, la dikna chun vante a tung hi. Aw Pathian, nangma, thil lopi takte bawlpa; nangma gual hi kua a hem um ngai?

²⁰Nangma’n, buaina leh lungjinna tam tak, ei la musak ma lechin ei suhal kit ding la hi’n; leinuai thûk tak ah kipat in ei puidok ding la hi.

²¹Nang in ka letna ei sukpun piak in, ei hun thamuan kit ding la hi.

²²Aw Pathian, la ginumna ziakin, ke’n le tingtang in hun chawihoi ing ka tin; aw Israelte mithiangtho, nangma pâk in theile’n La sa’ng ka.

²³La pâkna La ka hun sak phat leh, ka mûk hi lim ah kiko in, ka hinna la hukdaw hile lim ta’n a.

²⁴Sun nitum in ka lei hinle, lei panpi’na thu gen in ah; ka siatna ding hawlte sukmualpho leh, sukzachat in a um tau hi.