Read Vaiphei SAM 75 Bible Online

SAM 75 - Vaiphei bible

SAM 75

¹Aw Pathian, kipak thu ka hun gen ui, la kiang in kipak thu ka hun gen ui; la min chu a nai hi. Mite’n la thilbawl lamdang takte a gen jak ui.

²Ka huntiam a tun phat leh dik tak in vaihawm ing ka.

³Lei leh a sung ah um zosia a kilîn phat leh, keima ngei hi ka hi a khuamte phudetpa chu. (Selah)

⁴Mi kisatheite kiang ah chun: “Kisathei kin,” ka ti hen; mi nunsiate kiang inle: “Kilâm sâng kiu inla,

⁵kilâm sâng ten kiu inla, chapo tak in thu gen kiu in,” ka ti hen.

⁶Kaisânna chu sualam ah pat hung a hipua’n, tumlam ah pat hungle a hipua’n, thalêk ah kipat hung le ahi diak puai;

⁷vaihawmna thukhentu chu Pathian ahi’n; pakhat a sawn niam ah, a dang a dom sâng sek hi.

⁸LALPA khut ah chun a lungnatna no a um in, a lungnatna uain pha tak ah chawhel zaw ahi; zia chu hun sungtha’n tin, khawvel ah mi nunsiate zosia’n chîpkang in au.

⁹Kei vang kumkhua’n kipak zing ing ka tin, Jakob Pathian pâk in La sâng ka.

¹⁰Mi nunsiate zosia kî chu sattan piak ing ka tin; mi dikte kî vang chu choisa’n in um in a.