Read Vaiphei SAM 77 Bible Online

SAM 77 - Vaiphei bible

SAM 77

¹Aw ngai tak in Pathian ka ko in, a het têi dingin ngai tak in Pathian ka ko hi.

²Buaina ka tuak hun in LALPA ka hawl ah; jankhua’n chawlnga lo ah khutjak in ka pauchap ah; himaleh, thamuanna ka mu zo puai.

³Pathian ka vak ngaitua ah, ka thûm ta mai ah; ka lung ka gêl det det leh, ka thagau a basam hi.

⁴Ka mit lei têtsak zing ah; paudok theilo khop in ka buai tai.

⁵Nidanglaite kha ka ngaitua ah, tuan ah tâng ah hunte kha ka hezing hi.

⁶Jan khua’n ka ngaitua ah; gunchu tak ah ngaitua’n ka hawl ah:

⁷“LALPA‘n kumkhua’n ei pâmpai ah, bangmatik ah le ei dawi ta lo ding ahi dia aw?

⁸A ngilneina chule kumkhua’n um ta lo ding a dia aw? A thutepte le mangthai den ta ding a dia aw?

⁹Pathian in ja’ngai ding hemil a hita dia aw? A lungnatna ziakin a lainatnate chu, a tûktân ziang a hita dia aw?” ka ti sek hi.

¹⁰Tichun, zia gual hin ka ti ta’i: “Chungnung Penpa khut chang lam sukdanglam ah a um hi, ka lungkhamna pen chu ahi,” ti in.

¹¹LALPA, la thilbawlte ngaitua zing ing ka tin; nidang lai ah la thilmak bawlte kha hezing ing ka.

¹²La thilbawl zosia kha ngaitua zing ing ka tin, la thilbawlte chu sût zing ing ka.

¹³Aw Pathian, la lampi a thiangtho hi. I Pathian uh gual ah lopi pathian kua ‘hem um?

¹⁴Nang chu thil lamdang tak, bawl sek Pathian chu la hi’n; namtin lak ah la hât dan la lat sak sek hi.

¹⁵La bân thahât tak in la mite, Jakob leh Joseph suante chu la hukdok hi.

¹⁶Tuite’n nangma a hun mu phât un aw Pathian, tuili thûkte’n nangma a hun mu phât un, lau in a kithing tau hi.

¹⁷Sumpite’n tuite a buntha’u a, vante a gi’n; la thalchang chu kiltin in a phe zawl zawl hi.

¹⁸Chîmpei in la vanpi a git sak ah; kawlphete chun khawvel a salvâk zot zot un; lei chu kithing in, a kilîng dup dup hi.

¹⁹La lampi’n tuisuagiat a haw theng in; la lamlian in tuisuagiat a hawtheng hi; ahi’n, la kengnung chu mu thei ahi puai.

²⁰Mosi leh Aron khut in la mite chu, belamhon gual in la puidok tai.