Read Vaiphei SAM 79 Bible Online

SAM 79 - Vaiphei bible

SAM 79

¹Aw Pathian, namdangte la gam sim in a hung un; la tempul thiangtho a hi’buak tau in; Jerusalem chu a hichim zo tau hi.

²La suakte luang chu chunglêng vachate, an dingin a piau a, la mithiangthote sa chu, lei ah gamsate nêk dingin a pia tau hi.

³A thisan uh Jerusalem kîmvêl ah tui gual in a sungthau ah; a vui ding a um ta puai.

⁴I hianghei mite gensiat in I um tau ah, I kiang nai tuam mite musit leh nuisan in I um tau hi.

⁵Aw LALPA, bang chan a hem la lungnat nâk lai ding? La itthîk siatsona chu mei gual ah kuang ding a hem?

⁶Nangma helo namtin chung ah la lungnatna sungtha’n la, la min lam lo lenggamte chung inle.

⁷Jakob val zo in, a chênna mun uh, pâmtul a suaksak tai.

⁸Ka pu leh pateu duk dak lona kha, ka chung un hezing kin la; la lainatna chun kin tak in, ei dawn ngal ziang ta hen, nasa tak ah tawden in ka um ta’ngal un.

⁹Aw ka hukhingpau Pathian, la min lopina dingin ei panpi in; la min ziakin ei hukdok inla, ka gitlonateu ngaidam in.

¹⁰Bang ding ah namtin in, “A Pathian uh khoi ah um a tam?” a tiu maw? La suakte thisan sua’na phuba lâkna chu, ka mitmuu in namtin lak ah hin het zing hita hen.

¹¹Suangkul ngâkte thûmgit la kiang tung hen la; la thilhitheina lopi dungzui in, thi ding ah umsate chu humbit in.

¹²Aw LALPA, ka vêl ua mite’n, a hun gensiatnau hi, a chung un a le’sagi’n hun thuk in.

¹³Chutichun, kei uh la mi, la gantatna mun ah la belamte hin, kumkhua’n kipak thu hun gen ing ka tiu in, a khang a khang in nangma hun pâk zing tâng kau.