Read Vaiphei SAM 88 Bible Online

SAM 88 - Vaiphei bible

SAM 88

¹Aw LALPA, ei hukhingpa Pathian, jan si’n leh la ma’n ka hun ko sek a,

²ka pauchapna hi la kiang tung hen la; ka hun ko’na aw hin la bildaw in.

³Ka hinna lungjinnate’n a dim ah, ka hinna’n Sheol a nai tul tul hi.

⁴Kawkhûk ah chiasukte lak ah simkhawm ka hi’n; panpi ding neilote gual bep ka hi tai;

⁵mi thisate lak ah nutsia in ka um ta’n, thalup ah um thân ah vui gual bep ka hi’n, la hetphâk tâk lo him him gual ka hi tai; amau chu la khut ah kipat tanthâk a hiziak un.

⁶Kawkhûk thûk pen leh thim pen ah chun lei koi tai.

⁷La lungnatna chun lei del khum a, nang in la tui kinawk zosia chu, lei chupsak tai.

⁸Ka gual ngaite lei kigamlat sak a; a tizat ding un lei siam tai. Pawtdok kit thei talo ding ah, khâk khum in ka um tai;

⁹lungkhamna ziakin ka mit le a chau tai. Aw LALPA, nisi’n in ka hun ko in, nangma lam ah ka khutte ka hun jak zing hi.

¹⁰Mi thisate â dingin thilmak bawl piak ding la hem? Thi’na khûk ah kipat hung tho in, nang hun pâk ding a hiu em?

¹¹La ngilneina thu thân khûk sung ah hetsak in, Abaddon ah chun la ginumna thu hetsak ding a hiu em?

¹²La thilmak bawlte chu thim lak ah het ah um in, la hukdawna thu chu hetmilna gam ah, het zing in um ding a hem?

¹³Ke’n vang, aw LALPA ka hun ko la hi; ka pauchapna chu jingkal si’n in, la ma’n hung tung in a.

¹⁴Aw LALPA, bang ding ah ei pâm pai la hem? Bang ding ah la mai ei kisêlsan la hem?

¹⁵Ka naupan lai ah kipat, da-um thuak leh thi vang vang in, la tizat umna huaisia tak ka thuak ta’n; beidong in ka um hi.

¹⁶La lungnatna’n ei chûm mang ah, la tizat umna chun ei hi’mangthai tai.

¹⁷Ziate chun nisi’n in, tuilian gual in ei chup kîmvêl un; ka kîmvêl in ei ûmchil ui.

¹⁸Ka gual leh ka Invêngte chu lei gamlatsak ah; ka gual ngaite chu thim lak in la umsak ta’i.