Read Vaiphei SAM 90 Bible Online

SAM 90 - Vaiphei bible

SAM 90

¹LALPA, nang chu suan zosia tiang ah ka umnau la hi.

²Tângte la siam masang leh, khawvel leh leilung la siam ma’nle, kumtuang ah kipat kumtuang tiang in, Pathian la hi.

³Mihingte hi leivui la chansak kit ah, “Mihingte haw, hung kile’kit un,” la ti hen.

⁴Nang â dingin kum sâng khat hile, ja’ni tum ta gual bep ahi’n, jan vên khat gual bep ahi.

⁵Amau chu la phiatmang ah, jan ah mang gual bep a hiu, jingkal ah hampa hung seldok tawhbang mai a hiu in;

⁶jingkal ah no dip dep in a hung dawndok in; nitâk lam ah tuai in a vuai ngal sek hi.

⁷La lungnatna ah hi’mangthai in ka um un; la thangtawmna chup mang in ka um ui.

⁸Ka mantheilonau la ma’n la koi hen, a gûk ah ka gitlonateu chu, la mêlvâk in la koi ta’ngal a.

⁹Ka damsung niteu le la lungnatna’n a mangthai ta’n; ka damsung kumteu hile thakhat in a hung bei sek hi.

¹⁰Ka damsung niteu hi kum sawmsagi ahi’n, hatna ziakin kum sawmgiat le a hithei hi; a sawtna chule sepgimna leh buaina bep ahi; a bei pai in, keimau le ka beimang tau hi.

¹¹La lungnatna thil hi’thei zia he’, la lau um gual tak ah la lungnatna nasat dan hi, kua a hem ngaitua sek?

¹²Tichun, ka damsung niteu tiam dan ei hil inla, pilna lungthim ka nei khawlaw hial theina ding un.

¹³Aw LALPA, hung kile’kit ta’n! Bang chan a hem la lungnat ding? La suakte hi khawtua ta’n.

¹⁴Jingkal in la ngilneina chun ei hitai inla, ka damsung zosiau ah ka lim ua, ka kipak theina ding un.

¹⁵Lei sukgentheina ni jat leh, thil phalo ka tuak kum sung tawh kigûn in, ei kipak sak ta’n.

¹⁶La thilbawlte la suakte kiang ah tâklang inla, la hâtna lopi tak chule, a chateu kiang ah tâklang in.

¹⁷LALPA I Pathian doisakna chu, I chung un um hen la, I khut nasepteu chu maljawl in um hen la, ahi, I khut nasepteu chu, maljawl in um zing ta hen!