Read Vaiphei SAM 95 Bible Online

SAM 95 - Vaiphei bible

SAM 95

¹Aw hung unla, LALPA chawihoi in La sa’i tiu; I hukhinnau suangpi chawihoi in, lim tak in kiko hitiu!

²Kipak thu gen kawm in a ma ah chun, chia khawm hitiu in; ama chawihoi ah pâkna La sa’n, lim tak in aw sua hitiu!

³LALPA chu Pathian lopi tak ahi’n, pathian zosia chung ah leng lopi tak ahi ngal a.

⁴A khut in lei mun thûk tak chule a um in; tângsâng takte chule ama â ahi.

⁵Tuisuagiat ama â ahi’n, ama siam ahi ziakin; mual kâng ama khutsuak hile ama â ahi.

⁶Aw hung unla, a ma-âng ah bokkhup in ho hitiu, LALPA ei Siampa ma ah hin khiangkho hitiu!

⁷Ama I Pathian uh ahi’n, a gantatna mun ah mite leh a belamte I hi’ngal un. Tu’ni bêk ah hin a aw chu a la ngaitha ding hi taleu chin aw!

⁸Gamthip ah Massah ah gual leh Meribah mun ah, a lungthim uh a hikhau gual un, la lungthim uh hikhau ta kiu in;

⁹ka thilbawlte muzing sapi’nle, la pu leh pateu khan ei la patep in, ei la zedawp tau hi.

¹⁰Zia khangte chung ah khan, kum sawmli hial ka lung a dam pua’n, “Zia mite hin ei kilepsan un, ka lampite a ngaisak puau hi,” ka la ti ta ahi.

¹¹Ziaziakchun, “Ka cholna’ lut pua’n au,” tin lungna’n sia ka la sam tai.