Read Vaiphei THUPILTE 1 Bible Online

THUPILTE 1 - Vaiphei bible

THUPILTE 1

¹Israelte Lengpa David chapa Solomon thupilte:

²Pilna leh kihilna, hettheina dingte, hetthiamna thu lunggil ah suangtua thiamna dingte;

³felnate, thutannate, pâmpai diak nei lo ah kichian tak ah hilna pom dan thiamnate;

⁴mimawlte lemhiatna neisak dingte, khanglaite hetna leh lamdik hetthiamna neisak dingte:

⁵mipilte’n a het ua, a thiamnau a hung pun ah, thil hekhen thiam mite’n vaihawm thiamnate a neina ding un,

⁶thupil leh a hilchiannate, mipil thu leh a thugil genteu, hetthiamna a neitheina ding un.

⁷LALPA launa hi hetna bul ahi’n, mingolte chun pilna leh, hilna thu a ngainêp sek ui.

⁸Ka cha, la pa zilgaina chu ngaitha’n la, la nu hilna chule ngaidau kin;

⁹la luchang â dingin pâk khi hoi tak gual hi’ntin, la ngawng â dingin, khivui gual hiding ahi ngal a.

¹⁰Ka cha, migilote’n hun jawl mang ding, a guat tak uh leh le nuam kin.

¹¹“Hung tia, thisan sua dingin chânggu tiam hitiu; a ziak bangma umlo in, mi ummuang hiat hiat ah poikhoilote suam dingin, chânggu’i tin,

¹²a hingsan in Sheol in a val zaw gual leh, lei kawhawm ah ketha gual in bawl hitiu.

¹³Thil lûl takte nei hitiu in, gâl lâk thuamphua’n I In uh hidim hitiu.

¹⁴Ka lak un âi hung sân in la, dangka dip pakhat kikop hitiu,” a tiu inle,

¹⁵ka cha, amau lampi chu zui kin la, a lampiu ah kipat kikoi kâng in;

¹⁶thil phalo bawlna dingin a kengteu a jang in, thisan sua nuam in a kinaw sek ui.

¹⁷Vachate mu’pêt ah a awkna ding uh, lên thâng kam chu a thawn ahi;

¹⁸zia gual mite chu amau thi’na dingin, amau hinna ma ma kichân-gûk a suak sek ui!

¹⁹Thagum hât ah lawkna hawlte chu, zia gual chu a hisek mawng ui; a neitu’ a pan vang ua leh, a thi khawlaw sek ui.

²⁰Pilna chun gam thawng khop in, khawlai dung in tâng a sam in, kotzingte ah chunle aw ngai tak in a kiko hi.

²¹Mipi punkhawm tamna pen mun in a kiko ah; khawpi kêlkot bul inle thu a gen in:

²²Nang uh mimawlte haw, bangchan a hem mawlna la ngainat ding uh? Bangchan a hem mi dâi chavaite daichâkvaina la limpiu ah, mingolte’n hiatthiamna a huat ding uh?

²³Ka hilna thu hi ngaisak un; ka lungthim la lak un hun gendok ing ka tin, ka thute chu hun hiatsak ing ka.

²⁴Ka ko le la lei dawnhu puau a, ka khut ka jak inle, kuama’n lei ngaisak puau hi,

²⁵ka lemguatna zosia bangma’n lei ngai piak puau in; ka zilgainate mawng mawng lah la pom nuam puau a;

²⁶la vangsiatnau nuisan ing ka tin, patauna’n a hun phâk phat leh, tawtna’n hun tha ding ka hi;

²⁷thigawpi’n a mût gual ah lungdonna la hun tuak ua, chîmpei gual ah vangsiatna la hun tuakna niu chun a hun phak a, haksat gentheina nasa tak in, a hun tun khum phat leh hun nuisan ing ka tin, tawtna’n hun tha ding ka hi.

²⁸Ziaphat chuleh, ei hun ko in la tiu in, himaleh, hun dawnhu ta pua’ng ka; gunchu tak in ei hun hawl in la tiu in, himaleh, ei mupha ta pua’n lau.

²⁹Hetna chu la huau ah, LALPA launa chu la têl lo ziak un,

³⁰ka lemguatna khat chale la mang nuam puau in, ka hilna zosia le la ngainêp un,

³¹ziaziak chun, la gamtatnau ga kinêk in la tiu in, la thilbawlteu ma chun hun hi’lungjing in a.

³²Mimawlte chiapetna chun thi’n la tiu in; mingolte lungawina chun hun hi’mangthai in a;

³³ahi’n, kua hileh ka thuhilna zui tapo chu, bit tak in um intin uh; thil phalo hung tun ding lau lo ah muang tak in, um hiat hiat in au.