Read Vaiphei THUPILTE 11 Bible Online

THUPILTE 11 - Vaiphei bible

THUPILTE 11

¹Bûkna diklo chu LALPA ki’dak lam tak ahi’n, bûkna dik chu a kipakna lam tak ahi.

²Kiletsakna a hung um phat leh, mualphona’n a hun zui sek in; kingaitawmte kiang ah chun pilna a um hi.

³Midikte chu a ginumnau in a pui huai in, ahi’n, mi dawhathûkte chu, a lungthim siatnau in a hi’mangthai hi.

⁴Lungnatna ni ah chun nei leh lam in, phatchuamna nei pua’n tin; ahi’n, dikna chun vang, thi’na kipat in hukdok in a.

⁵Demna bei mi chu a dikna chun lampi zang ah pui zing intin; ahi’n, mi nunsia chu amau nunsiatna ma ma in kipûk in au.

⁶Mi lamzangte chu a diknau in hukdok intin; ahi’n, mi dawhathûkte chu, amau dawha phalo suak in lut in au.

⁷Mi nunsia chu a thi tawh kigual in a kinepna chule bei ngal intin; sakhua ngaisak lote kinepna chule bangmalo a hung hisek hi.

⁸Midikte chu lungdonna lak ah kipat hukdaw in a um un, mi nunsia chun lungdonna tuak in au.

⁹Pathian he’phalote chun a kam un, a Invêngte manthaina ding thu a gen un; himaleh, hetna ziakin midikte chu hukdok in a um ui.

¹⁰Midik in vangphatna a don phat leh, khawpi sung ah mite a kipak sek un; mi nunsia a thi phat leh mite’n a awi-âm sek ui.

¹¹Mi lamzangte maljawlna chun khawpi choihoi in a um in; ahi’n, migilote kampau siat ziakin, khawpi chu hisiat in a um sek hi.

¹²Mi gensia tapote chu ngaituana tasam a hiu in; ahi’n, mi lunggêl thei mite chu thipbek in a um sek ui.

¹³Mi mûksan thu tut tawl tawl te chun thugûk a gen jak sek un, ahi’n, ginumna lungthim nei mi chun a îm sek hi.

¹⁴Kikaihuaina umlo ziakin mite a pûk sek un; ahi’n, kawkmutu pil tamna chun bitna a um sek hi.

¹⁵Mêlhet lo sik leh jal ah dingte chun, buaina tuak ngei ngei intin; himaleh, zia gual ah pang nuamlote â ding chun bitna a um hi.

¹⁶Numei zaidaw thiam chun ja’na mu’n tin, ahi’n, umchan helo chun jachâkna tuak in a. Mi thada chu hung tasam intin, mi taima chun hausakna mu’n a.

¹⁷Mi khawtua thiam chun ama â ding ah thilpha a kibawl ahi; ahi’n, mi êngsia vang chun ama â ding ah siatna a kibawl ahi.

¹⁸Mi nunsia’n lawkna dik mu pua’n tin, ahi’n, dikna chî tute chun kipakman dik tak chu mu’n au.

¹⁹Dikna ngaina tudet chu hing intin; thil phalo delte vang chu thi ding a hiu.

²⁰Mi lungthim chanlam beite chu LALPA ki’dak lam tak ahi’n; a lampiu dik bukimte chu a kipakna lam tak ahi.

²¹Mi nunsia chu gawt lo in suakcha pua’n tin; midikte chun gawtna pumpel in au, ti hezing in.

²²Numei mêlpha, umzia helo chu, vokpi nâk ah sana chaucha bûsak tawhbang ahi.

²³Midikte duthusam tawpna chu thilpha ahi’n; mi nunsiate duthusam tawpna chu lungnatna a hisek hi.

²⁴Hawm jak tam chu pun zawk diakna ahi’n; a piak dingsa ziang le pedok nuamlote chun tâksapna tuak in au.

²⁵Mi huangphal chu hihausak in um intin; midang tui petu chu tui piak in um in a.

²⁶Midang kiang ah bu hawmdok nuam lo pa chu, mipi’n hânsia law intiu in; huangphal tak ah zuakdok pa chun, maljawlna dong in a.

²⁷Gunchu tak ah thilpha hawl chun, doisakna hawl ahi’n; siatna hawltu chung in vang siatna a tung sek hi.

²⁸A hausakna muangte chu hung tuai intiu in; midikte chu thingdua hing tak gual in sel thak kit in au.

²⁹Ama In sung subuai pa chu, hui gual in mangthai intin; mingol chu mipil suak ah lut in a.

³⁰Midik ga chu hinna thing ahi’n; thagum sua chîngte chun hinna a lamang sek ui.

³¹Midikte bawn lei chung ah piak thuk kit a hiu chun, mi nunsia leh migilote chu, bang gual bep ah nasa’n thuk kit a hita diam uh maw!