Read Vaiphei THUPILTE 13 Bible Online

THUPILTE 13 - Vaiphei bible

THUPILTE 13

¹Cha pil chun a pa thununna a ngaisak a, mutawmtu chun vang thuhilna a ngaisak puai.

²Mipha chun a kam thiam man thilpha kinêk intin; mi phalo duthusam vang thil phalo bawl nopna ngen ahi.

³A kam chingtup theite chun a hinnau a humbit un, thu mawk gente chun siatna tuak in au.

⁴Mi juljau lungthim chu a huaihap a; maleh, bangma a nei law puai; mi gunchu duthusam chu, tam tak ah piak ahi.

⁵Midik in zuautheina a hua hen, mi nunsia vang jachak um tak leh, ki’dak um tak in a tawi sek ui.

⁶Diktatna chun mi lamzangte a chingtup in; gitlona chun vang mi nunsiate a buan pâi sek hi.

⁷Khenkhat bangma neilo ah kihausatsak a um un; neinung ma ma ngal ah kichagatsak a um kit ui.

⁸Hausakna chun mihing hinna a tandok sek in, michaga chun vang kitatna ding a nei puai.

⁹Midik meivak chu a vâk zing ah, mi nunsia thaumei chu vang mûtmit piak ahi.

¹⁰Kiletsakna chun kinakna a sua sek in; thuhilna pomte kiang ah chun pilna a um sek hi.

¹¹Bailam tak ah hausakna kilakhawmte chu, bailam tak in kiamtha kit intin; tha gim tak ah neucha cha lakhawmtu vang chu pung in a.

¹²Lungtup kibang lo chu lungthim natna ahi’n; lungtup mualsuana chu hinna thing gual ahi.

¹³Thu ngai lo mi tapo in a manthaina ding uh a kibawl un; thupiak jate chun vang kipakman chang in au.

¹⁴Mipil zilsakna chu hinna tuinâk gual ahi’n; thi’na thâng pêlna le ahi.

¹⁵Hetthiamna nei chun doisakna a dong in, hetthiamna beite lampi chu siatna ahi.

¹⁶Mipil in bangkim chingthei tak in a bawl sek in; mingol in vang a ngolna a tâklang sek hi.

¹⁷Thangko thulim lo chun buaina a tun a; palai ginum chun vang damna a tun sek hi.

¹⁸Zilgaina ngaisak lo chung ah chun châtgâna leh, mualphona tung intin; zilgaina ngaisak tapo chun jana dong in a.

¹⁹Duthusam a guitun chun hinna â dingin a thum ah; thil phalo jamsan chu mingolte ki’dak lam tak ahi.

²⁰Mipil tawh kivop chu pil intin; miphalote lawi pawlna chun vangsiatna a tun sek hi.

²¹Mi nunsiate nung chu vangsiatna’n a zui sek in; midikte chuvâng nei leh lam in a zui sek hi.

²²Mipha chun a tute â ding tiang in go a nutsia piak sek in; mi nunsiate go chu vang midikte lua ding bep ahi.

²³Michaga lou lai ah chun bu tam tak a piang thei ah; maleh, diklo tak ah vaihawmna ziakin hi’mangthai in a um sek hi.

²⁴Chate vaw lo chu a doisak lo ahi’n; a doisakte chun vang gunchu tak in a thunun sek ui.

²⁵Midik chun ama taina ding khop nêk ding a nei zing in; mi nunsia vang gilkial ah taitêp in a um zing hi.