Read Vaiphei THUPILTE 15 Bible Online

THUPILTE 15 - Vaiphei bible

THUPILTE 15

¹Nêm tak ah dawnhuna chun lungnatna a dai sak sek ah; dangkhau in vang lungnatna a choktho sek hi.

²Mipil lei chun hetna thu dik tak in a gendok sek in; mingolte kam in vang ngolna thu a sêkdok sek hi.

³LALPA mit chu mun tin in a um a, mipha leh phalo a entha zing hi.

⁴Kam jainêm chu hinna thing ahi’n; lochalna kamsuak in thasiatna a tun sek hi.

⁵Mingol in a pa hilna a musit in, a pa hilna hethiamte chu mi lunggêl thei a hiu.

⁶Midik In ah chun nei leh lam a tam in, migilo sum mute chu vang buaina ding bep ahi.

⁷Mipil mûk in hetna a thejak ah, mingolte lungthim vang zia gual chu ahi puai.

⁸Mi nunsia kithoina chu LALPA ki’dak lam tak ahi’n; mi lamzang pauchapna vang, a kipakna lam tak ahi.

⁹Mi nunsiate lampi chu LALPA ki’dak lam tak ahi’n; dikna del ham hamte chu a ngainat lam tak ahi.

¹⁰Lam dik pêtsante chung in hânsia a um in, thununna ngaidate chu thi ding a hiu.

¹¹Sheol leh Abaddon chu, LALPA ma-âng ah kihongsa ahi’n, mihingte lungthim vang chu a mu chian na lawm lawm ding e!

¹²Mi musitte chun hilna a ngai thei puau in, mipilte le a vê nuam puau hi.

¹³Lungthim kipakna’n maisua a hi tai a, lungthim ah lungngaina chun thagau a hi’thasia sek hi.

¹⁴Hetthiamna nei lungthim chun hetna a hawl sek in; mingol kam chu zuau thu’n a kivâkva sek hi.

¹⁵Migenthei in ni zosia hi haksa tak in a mang zing a; lungthim ah kipak zingte chu luaithe zing ziang gual ahi.

¹⁶LALPA lau kawm ah tawmcha nei chu, buai tak ah tam tak nei sâng in a pha zawi.

¹⁷Kidoisakna tawh anche me mai chule, kihuatna tawh bawng thau tak sa nêk sâng in a pha zawi.

¹⁸Lungchomna chun kinakna a siam in, jaidawna chun kichamna a siam hi.

¹⁹Mi thabei lampi chu ling leh khau in a dim in; mi lamzangte lampi vang lamlian gual in a kithung hi.

²⁰Cha chingte chun pa kipakna a siam un, cha ngolte chun a nu a musit sek ui.

²¹Ngaituana neilote â dingin ngolna hi a limnau ahi’n; hetthiamna neite chun vang dikna lampi a haw sek ui.

²²Kikuptuana pil umlona chun thil guanggalte a lawsam sek in; kikuppi ding tamna chun vang thil guanggalte a lawting sek hi.

²³A hun tak ah thuhilna chun mi tin lung a hi’dam ah; a hun tak ah thu kigendok chu bang gual bep ah pha ahi tam!

²⁴Hinna lampi chun nuai lam ah Sheol a pêltheina dingin, mipil chu chung lam in a pui to sek hi.

²⁵LALPA‘n mi kiletsakte In chu a phiat piak sek a; meithâite gamgi chu vang a hi’det piak sek hi.

²⁶Thil phalo guanggal chu LALPA ki’dak lam tak ahi’n; lungthim thiangtho chu a lung lam tak ahi.

²⁷Lam diklo tak ah lawkna hawl ah du-âmte chun, a In sung â ding ah buaina a kisiam in; golgûkna dawilote chu vang hing in au.

²⁸Midik in bang gual ah dawnhu ding a hem ti a lung a gêl tadi in; migilo in a kam ah kipat in thil phalo a sêkdok molmaw sek hi.

²⁹LALPA chu migilote ah kipat gamla tak in a um in; midikte pauchapna chu vang a ngaitha zing hi.

³⁰Nuina mêl in mi a kipaksak in, thupha chun a hi’hal sek hi.

³¹Zilgaina piting pomtheite chu mipil lak in chêng in au.

³²Thununna ngaisak lo chu ama leh ama kisulêlo ahi’n, zilgaina pomtu chun vang hetna a mu belap hi.

³³LALPA launa chu pilna lampi kihilna ahi’n; kingaitawmna chu choisa’n ah umtheina ahi.