Read Vaiphei THUPILTE 18 Bible Online

THUPILTE 18 - Vaiphei bible

THUPILTE 18

¹Mi kholbîk chun ama ângsung bep a khual hen, pilna dik zosia chu bangma’n a ngai puai.

²Mingol chun hetthiamna a kipakpi pua’n, ama ngaidan bep gendok chu a kithalawp hi.

³Nunsiatna chu bangma kingailona’n a hun zui sek in; kijana a umlo phat leh mualphona a hung um sek hi.

⁴Mihing kamsuak chu tuili thûk tawhbang ahi’n; pilna bulpi hile luicha luang tawhbang ahi.

⁵Midik lo doisak zawk chu a pha pua’n; vaihawmna midik thiamlo chansak chule a pha diak puai.

⁶Mingol kam ah thu pawt chun kinakna a hung piang sek in; a kam in a thokna ding a kigendaw bep sek hi.

⁷Mingol in a kamsuak chu a thi’pi sek in, ama kampau ma ma chu thâng ah pang in a hung awk sek hi.

⁸Kihogûkna mûk phun hi an tui tak gual ahi’n; taksa sunggil in a lut suk sek hi.

⁹Nasep thadâ chu mi gawt mangthaipa suapi ahi.

¹⁰LALPA min hi kulpi det ahi hen, midik in zia chu a bêl in humbit in a um sek hi.

¹¹Mi hausate nei leh lam chu a khawpi det uh ahi hen; amau lunggêl dan ah chun a kulbâng sâng tak gual ahi.

¹²Manthaina ma’n lungthim chapona a hung um masa sek in, choisânna ma-âng in kingaitawmna a um masa sek hi.

¹³Thu hetchian masang ah dawnhu pai sek chu, ngolna leh mualphona a hisek hi.

¹⁴Mi lungthim nei chun natna a thuak hat in; ahi’n, lungthim nâte chu vang kua a hem thuak zo ding?

¹⁵Mi lungthim pil in chitna a kimu belap sek in, mipil beng chun hetna a hawl belap sek hi.

¹⁶Thilpiak in kot a hong ah, miliante kiang ah luttheina a pesek hi.

¹⁷A dikna thu gen masate chu a dik in kilang masa sek maleu, a langpa’n a hun gen phat leh, a dik zaw a hung kilang sek hi.

¹⁸Âisân hin kinialna a hibei ah, mi thunei tak tak kinialte chu a gen tan sek hi.

¹⁹Gualpha sukthasiat jawl lungdam kit chu, khawpi det tak lâk sâng in a haksa zaw’n; zia gual ah kilemlona chu, thikdâi kulpi gual ahi.

²⁰Min a kamsuak un a gilpi vâna ding a kigen daw sek un, a mûk ah thu pawt in hitai ding ahi.

²¹Mihingte kam ah chun hinna leh thi’na a um a; zia ngaina tapote chun a ga chu ne ngei in au.

²²Ji mu chu thilpha mu ahi’n, LALPA doisakna chang ahi.

²³Michaga chu a thûm thaw sek in, mi hausate chun hutum in a dawnhu sek ui.

²⁴Gual leh pâi pha tak gual in khenkhat a kisiam kawm un; ahi’n la, gual pha leh ginumte chu, pianpi unau sâng inle a ginum zaw kit ui.